યૂક્રેનથી વધુ 27 ગુજરાતી વિદ્યાર્થીઓ સહીસલામત પરત આવ્યા, CM પટેલ અને જીતુ વાઘાણીએ કર્યું સ્વાગત
ગાંધીનગર: યૂક્રેનથી (Russia Ukraine) ઓપરેશન ગંગા હેઠળ ચોથી ફ્લાઇટમાં 194 ભારતીયોને લાવવામા આવ્યા હતા. જે પૈકીના 27 ગુજરાતી વિદ્યાર્થીઓ (students from Ukraine) આજે સવારે ગાંધીનગર સર્કિટ હાઉસ પહોંચ્યા હતા. આ વિદ્યાર્થીઓને દિલ્હીથી ખાસ બસમાં આજે ગાંધીનગર લાવવામાં આવ્યા હતા. મુખ્યમંત્રી ભૂપેન્દ્ર પટેલ તથા શિક્ષણમંત્રી જીતુ વાઘાણીએ પરત ફરેલા ગુજરાતી વિદ્યાર્થીઓને આવકાર્યા છે. આ સાથે વિદ્યાર્થીઓ સર્કિટ હાઉસ આવતા જ તેમના ખબર અંતર પૂછી દરેકને તેમના ઘરે મોકલવામાં આવશે.
આ અંગે જીતુ વાઘાણીએ પોતાના સોશિયલ મીડિયા હેન્ડલ પર જણાવયું કે, માનનીય મુખ્યમંત્રી ભૂપેન્દ્ર પટેલ સહ ગુજરાત પરત આવેલ યુક્રેનના યુદ્ધગ્રસ્ત વિસ્તારોમાં ફસાયેલા વિદ્યાર્થીઓને તેઓના પરિવાર સાથે મળવાનું થયું. તમામ વિદ્યાર્થીઓને રેસ્ક્યુ ફ્લાઇટમાં હેમખેમ વતન પરત લાવવા બદલ આદરણીય વડાપ્રધાન નરેન્દ્ર મોદીનો હૃદયપૂર્વક આભાર વ્યક્ત કરું છું.
