આઠ બેંક ખાતામાં સાયબર ફ્રોડના રૂા.1.78 કરોડ જમા, નવની ધરપકડ | Cyber fraud worth Rs 1 78 crore deposited in eight bank accounts nine arrested
રૂા.5 હજારથી રૂા.10 હજાર લઇ બેંક ખાતા ભાડે આપ્યા હતા
રાજ્યભરમાં ઓપરેશન મ્યુલ હન્ટ 2.0 હેઠળ ગુના દાખલ કરવાનું શરૂ, રાજકોટ જિલ્લામાં આઠ ગુના નોંધાયા
રાજકોટ: સાયબર ફ્રોડ માટે મામૂલી રકમ લઇ પોતાના બેંક ખાતા ભાડે આપનારાઓ વિરુદ્ધ રાજ્યભરમાં ઓપરેશન મ્યુલ હન્ટ અંતર્ગત ગુના દાખલ થયા બાદ હવે બીજા તબક્કામાં પણ ગુના દાખલ કરાવવાનું શરૂ કરાયું છે. રાજકોટ જિલ્લામાં કુલ ૮ ગુના દાખલ થયા છે. જેમાં કુલ ૧૬ આરોપીઓમાંથી ૯ની પોલીસે ધરપકડ કરી છે. આ તમામ ૮ ગુનામાં સંડોવાયેલા ૧૬ શખ્સોના ૮ બેંક ખાતામાં સાયબર ફ્રોડના રૂા.૧.૭૮ કરોડ જમા થયા હતા. જે અંગે દેશભરમાંથી ૫૦ અરજીઓ મળી હતી.
રાજકોટ રૂરલ એસપી વિજયસિંહ ગુર્જરે જણાવ્યું કે, ધરપકડ કરાયેલા આરોપીઓએ રૂા.૫ હજારથી લઇ રૂા.૧૦ હજારમાં એક મહિના માટે પોતાના એકાઉન્ટ ભાડે આપ્યા હતા. અમૂક ગ્રામ્ય વિસ્તારના નાગરિકોએ પણ પોતાના એકાઉન્ટ ભાડે આપ્યા હતા. પરંતુ તેમને પોતાના એકાઉન્ટ સાયબર ફ્રોડ માટે ભાડે લેવાયાની જાણ ન હોવાથી તેમના વિરુદ્ધ ગુના દાખલ કરવામાં આવ્યા નથી. જેમણે જાણકારી સાથે પોતાના એકાઉન્ટ ભાડે આપ્યા હતા તેમને જ આરોપી બનાવાયા છે. આગામી દિવસોમાં વધુ ગુના દાખલ થશે. જે ખાતાધારકો સામે ગુના દાખલ થયા છે તેમના ખાતામાં ગેમિંગની રકમ પણ જમા થયા હતા. જેને હાલ ધ્યાને લેવાઇ નથી. માત્ર સાયબર ફ્રોડની રકમ જ ધ્યાને લેવાઇ છે.
વિંછીયા, ગોંડલ સિટી બી.ડિવિઝન, મેટોડા, જસદણ, ગોંડલ તાલુકા અને પડધરી પોલીસ મથકમાં એક જ્યારે ધોરાજી પોલીસ મથકમાં બે મળી કુલ આઠ ગુના દાખલ થયા છે. વિંછીયાના ગુનામાં બે આરોપીઓ સાગર ધીરુભાઇ ઝાપડીયા અને યોગેશ મુકેશભાઇ રાઠોડ (રહે. બંને વિંછીયા), ગોંડલ સિટી બી.ડિવિઝનના ગુનામાં સુલતાનશા રહેમાનશા શાહમદાર (રહે. વોરાકોટડા રોડ, ગોંડલ, હાલ જામનગર), મોસીન દાઉદ શાહમદાર (રહે. રણજીત રોડ, જામનગર), હુસેન ગફારભાઇ કાસમાણી (રહે. અલસફા સોસાયટી, જામનગર), મેટોડા પોલીસના ગુનામાં મિતલ ગોપાલદાસ રૂપારેલીયા (રહે. એસઆરપી કેમ્પ સામે, રાજકોટ), જસદણ પોલીસના ગુનામાં મહિપત વિરજીભાઇ પરમાર (રહે. ગઢડીયા, તા.જસદણ), ગોંડલ તાલુકા પોલીસના ગુનામાં ભરત અરજણદાસ રાવતાણી (રહે. પરસાણાનગર શેરી નં.૭, જામનગર રોડ) અને પડધરી પોલીસના ગુનામાં સાગર બાલકૃષ્ણ દાણીધારીયા (રહે. રાજકોટ)ની ધરપકડ કરવામાં આવી છે.
– ક્યા ગુનાનાં આરોપીના ખાતામાં કેટલી સાયબર ફ્રોડની રકમ જમાં થઇ ?
રાજકોટ: વિંછીયામાં નોંધાયેલા ગુનાના બે આરોપીઓના બેંક ખાતામાં સાયબર ફ્રોડના રૂા.૨૫ હજાર (બે અરજી), ગોંડલ સિટી બી.ડિવિઝન પોલીસમાં નોંધાયેલા ચાર આરોપીઓના બેંક ખાતામાં રૂા.૪૦ હજાર (એક અરજી), મેટોડા પોલીસમાં નોંધાયેલા ગુનાના બે આરોપીઓના ખાતામાં રૂા.૬૨ લાખ (૨૪ અરજી), ધોરાજી પોલીસ મથકમાં નોંધાયેલા બે ગુનાના પાંચ આરોપીઓના ખાતામાં રૂા.૩૦ લાખ (૫ અરજી), જસદણ પોલીસમાં નોંધાયેલા ગુનાના એક આરોપીના ખાતામાં રૂા.૧ લાખ (૪૪ અરજી), ગોંડલ તાલુકા પોલીસમાં નોંધાયેલા ગુનાના એક આરોપીના ખાતામાં રૂા.૮૪.૮૬ લાખ (૧૬ અરજી) અને પડધરી પોલીસ મથકમાં નોંધાયેલા ગુનાના એક આરોપીના ખાતામાં રૂા.૨૦ હજાર (૨ અરજી) જમા થયા હતા.
– સાત વોન્ટેડ આરોપીઓના નામ, સુરત કનેક્શન ખુલ્યું
રાજકોટ: રાજકોટ જિલ્લામાં જે આઠ ગુના દાખલ થયા છે તેમાં સાત આરોપીઓ વોન્ટેડ છે. જેમાં કૃણાલ હાથીવાલા (રહે. ઉધના, સુરત), સાહિલ, હિતેશ જમન સલાટ (રહે. રેલવે સ્ટેશન પાસે, ધોરાજી), સિરાજ ખલીફા (રહે. ધોરાજી), સોહેલ સિદિક શેખ (રહે. ધોરાજી), શકીલ યુસુફ અગવાન (રહે. ધોરાજી) અને સિરાજ ખલીફા (રહે. ધોરાજી)નો સમાવેશ થાય છે. સાયબર ફ્રોડના પ્રકરણમાં સુરત કનેક્શન ખુલતાં પોલીસની એક ટીમ ત્યાં રવાના કરવામાં આવી છે.
