વાવ-થરાદ: અભેપુરામાં દારૂના દૂષણથી કંટાળેલી મહિલાઓ પોલીસ મથકે દોડી ગઈ, પોલીસે અઠવાડિયાનો સમય માગ્યો | women demand action against bootleggers in abhepura Vav Tharad
Vav-Tharad News: વાવ-થરાદ જિલ્લાના આવેલા અભેપુરા ગામમાં દેશી દારૂના દૂષણે માઝા મૂકી છે. ગામમાં ધમધમતી દેશી દારૂની હાટડીઓ અને બુટલેગરોના ત્રાસથી કંટાળેલી મહિલાઓ આજે (પાંચમી જૂન) ન્યાયની માંગ સાથે થરાદ પોલીસ મથકે દોડી આવી હતી. મહિલાઓ મોટી સંખ્યામાં પોલીસ સ્ટેશને પહોંચતા જ પોલીસ તંત્રમાં ભારે દોડધામ મચી ગઈ હતી. ગામલોકોએ પોલીસ અધિકારીઓ સામે હાથ જોડી અને પગે પડીને ગામમાંથી દારૂનું દૂષણ નાબૂદ કરવા ભાવુક અપીલ કરી હતી.
પોલીસ સામે મહિલાઓ ભાવુક થઈ
મળતી માહિતી અનુસાર, અભેપુરા ગામની મહિલાઓ અને સ્થાનિક રહીશો અગાઉ અનેક વખત રજૂઆતો કરીને થાક્યા બાદ આજે પોલીસ સ્ટેશને આવ્યા હતા. જ્યારે થરાદ પોલીસ સ્ટેશનના પીઆઈ (PI) લોકોની રજૂઆત સાંભળી રહ્યા હતા, ત્યારે ગામની મહિલાઓ ભાવુક થઈને પોલીસ ઇન્સ્પેક્ટર સામે બે હાથ જોડી અને પગે લાગીને વિનંતી કરી હતી કે, ‘સાહેબ, ગમે તેમ કરો પણ અમારા વિસ્તારમાં દેશી દારૂ વેચાતો બંધ કરાવો, અમારા ઘર બરબાદ થઈ રહ્યા છે.’
રજૂઆત દરમિયાન ગામના એક યુવાન વિરચંદ ઠાકોરે પોલીસની કામગીરી અને બુટલેગરો સાથેની મિલીભગત પર ગંભીર આક્ષેપો કરતા સવાલો ઉઠાવ્યા હતા, જેના કારણે મામલો વધુ ગરમાયો હતો. યુવકે જાહેરમાં આક્ષેપ કર્યો હતો કે, ‘મેં ગઈકાલે સાંજે જ પોલીસને ફોન કરીને બાતમી આપી હતી કે સાહેબ અમારા વિસ્તારમાં દારૂ વેચાઈ રહ્યો છે. પરંતુ નવાઈની વાત એ છે કે મિનિટોમાં જ બુટલેગરનો મારા પર સામો ફોન આવી ગયો કે તું કેમ પોલીસમાં રજૂઆત કરે છે? અમારી આ ગુપ્ત વાત પોલીસ સ્ટેશનમાંથી લીક ક્યાંથી થઈ?’ બાતમીદારની વિગતો બુટલેગર સુધી પહોંચી જતાં સ્થાનિક લોકોમાં ભારે રોષ જોવા મળ્યો હતો અને પોલીસની ભૂમિકા શંકાના દાયરામાં આવી હતી.
DYSPએ એક અઠવાડિયાની ખાતરી આપી મામલો શાંત પાડ્યો
મામલો વધુ વણસે અને કાયદો-વ્યવસ્થાની સ્થિતિ વણસે તે પહેલાં જ થરાદ પોલીસ સ્ટેશનના ડીવાયએસપી (DYSP) એસ. એમ. વાળોતરિયા તાત્કાલિક દોડી આવ્યા હતા. તેમણે અભેપુરા ગામના લોકો અને ખાસ કરીને મહિલાઓની તમામ ઉગ્ર રજૂઆતો શાંતિપૂર્વક સાંભળી હતી.
ડીવાયએસપી વાળોતરિયાએ કડક કાર્યવાહીનો ભરોસો આપતા મહિલાઓને ખાતરી આપી છે કે, ‘એક અઠવાડિયાની અંદર અભેપુરા વિસ્તારમાં દેશી દારૂના અડ્ડાઓ પર કડક કાયદાકીય એક્શન લેવામાં આવશે.’ ઉચ્ચ અધિકારીની આ ખાતરી અને આશ્વાસન બાદ આખરે મહિલાઓ શાંત થઈ હતી અને મામલો હાલ પૂરતો થાળે પડ્યો હતો.
