નલ સે જલ યોજનામાં હાઇડ્રોલિક ઈજનેરની ભરતીના આદેશનું વડોદરા કોર્પોરેશન દ્વારા ઉલ્લંઘન | Vadodara Corporation violates order to recruit hydraulic engineer in Nal Se Jal yojana
Vadodara Corporation : વડોદરા કોર્પોરેશનમાં 35 વર્ષ જૂનું મહેકમ મંજૂર થયેલું છે તે મુજબ પણ ખાલી પડેલી જગ્યા ભરવા તેમજ વસ્તી, વિસ્તાર વધ્યો તે પ્રમાણે વધારાનું મહેકમ પુરૂ કરવા વડોદરા મહાનગરપાલિકા કર્મચારી મહામંડળ દ્વારા વર્ષ 2020થી માગણી કરવામાં આવી રહી છે. છતાં કોર્પોરેશનનું તંત્ર કાર્યવાહી કરતું નથી અને એક જ અધિકારીના માથે 5 થી 6 વિભાગોની વધારાની જવાબદારી થોપી બેસાડવામાં આવે છે.
વર્ષ 2023માં રાજ્ય સરકારે પરિપત્ર જારી કર્યો હતો કે, નલ સે જલ યોજના હેઠળ તમામ કોર્પોરેશને હાઈડ્રોલિક એન્જિનિયરની નિમણૂંક કરવાની રહેશે. જે આધારે અમદાવાદ, રાજકોટ, સુરત, આણંદ જેવા તમામ શહેરોમાં નિમણૂંક થઈ પરંતુ વડોદરામાં આજ સુધી થઈ નથી. જે તે કોઈ અધિકારી કે કર્મચારીની ફરિયાદ આવે તો તુરંત બદલી કરવામાં આવતી હોય છે. પરંતુ વડોદરા કોર્પોરેશનમાં અનેક કર્મચારી એવા છે કે જેઓ 10 થી 15 વર્ષથી એક જ જગ્યાએ ચીટકી રહેલા છે છતાં તેઓની બદલી થતીં નથી.
કામોની એક સૂત્રતા માટે અમદાવાદમાં સેલ : વડોદરામાં વિકાસના કામોમાં વિસંગતતા
અમદાવાદમાં તાજેતરમાં મ્યુનિ.કમિશનર બંછાનિધિ પાનીએ પાણી, ડ્રેનેજ, વરસાદી ગટર અંગે નવુ નેટવર્ક કરવા સુધારા માટે એક સૂત્રતા જાળવવા વોટર રિસોર્સ મેનેજમેન્ટ પ્લાનિંગ સેલની રચના કરી તેના દ્વારા કામો કરવાનું નક્કી કર્યાં. પરંતુ વડોદરામાં આવો કોઈ સેલ નહીં હોવાથી પાણી, ડ્રેનેજ, વરસાદી ગટર જેવા પ્રાથમિક સુવિધાના કામો વોર્ડ, ઝોન અને પ્રોજેકટ વિભાગમાંથી થતાં રહે છે. તેને કારણે નાહકનો કરોડો રૂપિયાનો વધારાનો ખર્ચ થાય છે. પાણીની તંગીના કારણે ત્રણ વર્ષમાં ટેન્કરથી પાણી પહોંચાડવા પાછળ રૂા.5 કરોડનો ખર્ચ થયો છે.
ત્યારે પાણી વિતરણનું નેટવર્ક વ્યવસ્થિત થાય તેમાં સુધારો કરવામાં ચૂંટાયેલી કે વહીવટી પાંખને કોઈને રસ નથી.
