રાજકોટમાં ડ્રગ્સ વેંચવા હવે પેડલરો દ્વારા સોશિયલ મીડિયાનો ઉપયોગ | Peddlers now use social media to sell drugs in Rajkot
રાજસ્થાનના સપ્લાયરે પાણી નાંખતા ડ્રગ્સનું વજન વધી ગયું !
રૂા.15 હજારનાં એમડી ડ્રગ્સના અંદાજે રૂા.1 લાખ ઉપજવાના હતા
રાજકોટ: શહેરમાં પેડલરો હવે ડ્રગ્સ વેંચવા માટે સોશિયલ મીડિયાનો ઉપયોગ કરી રહ્યાની ચોંકાવનારી માહિતી બહાર આવી છે. ગઇકાલે મેફેડ્રોન સાથે પકડાયેલા ઇરફાન ઉર્ફે રોમીયો ચાનીયાએ પોતાના ઇન્સ્ટાગ્રામથી મિત્ર સર્કલમાં ડ્રગ્સનો મેસેજ મુક્યો હતો. જેની જાણ થતાં એસઓજીએ તેને ઝડપી લીધો હતો.
ચોંકાવનારી વાત એ છે કે ઇરફાન છેલ્લા દોઢ વર્ષમાં ત્રીજી વખત ડ્રગ્સ સાથે ઝડપાયો છે. ત્રણેય વખત તેને એસઓજીએ જ પકડયો છે. થોડાક દિવસો પહેલા જ તે જામીન ઉપર છુટયો હતો. ત્યાર પછી સીધો રાજસ્થાન પહોંચ્યો હતો. જ્યાંથી ૨૦ ગ્રામ મેફેડ્રોન રૂા.૧૫ હજારમાં લઇ રાજકોટ આવતા ગણતરીના કલાકોમાં ઝડપાઇ ગયો હતો.
તેની પાસેથી ૧૪ ગ્રામ ૧૦૦ મિલિ ગ્રામ મેફેડ્રોન મળ્યું છે. એસઓજીએ તપાસ કરતા એવી વિગતો મળી છે કે સપ્લાયરે ડ્રોપરથી એક-બે ટીપા પાણી નાંખી દેતા અમુક ગ્રામ વજન વધી ગયું હતું. પાણી સૂકાઇ જતાં ડ્રગ્સનું વજન ઘટી ગયું હતું. જો કે આ રીતે સપ્લાયરો જ ચિટિંગ કરતા હોય તેવું નથી. પેડલરો પણ ૧ ગ્રામની પડીકીનું કહીં તેનાથી ઓછા વજનની પડીકી ધાબડે છે.
રૂા.૧૫ હજારમાં ખરીદેલા ડ્રગ્સથી ઇરફાનને અંદાજે રૂા.૧ લાખ ઉપજવાના હતા. આ રીતે ડ્રગ્સના વેપલામાં તગડો નફો હોવાથી વધુને વધું પેડલરો સક્રીય થઇ ગયા હોવાનું તારણ નીકળ્યું છે. આ કેસની તપાસ હવે ગાંધીગ્રામ પોલીસને સોંપાઇ છે.
