ડોનાલ્ડ ટ્રમ્પની ચીન ઉતરતા જ ફજેતી, શી જિનપિંગ એરપોર્ટ પર સ્વાગત માટે ન આવ્યા | donald trump china visit 2026 xi jinping airport welcome protocol taiwan issue
Donald Trump China Visit 2026: અમેરિકાના રાષ્ટ્રપ્રમુખ ડોનાલ્ડ ટ્રમ્પ તેમની બીજી ટર્મ દરમિયાન પ્રથમ વખત ચીનના બે દિવસીય સરકારી પ્રવાસે પહોંચ્યા છે. જોકે, આ પ્રવાસની શરૂઆતમાં જ એક પ્રોટોકોલ વિવાદ સામે આવ્યો છે, કારણ કે ચીની રાષ્ટ્રપ્રમુખ શી જિનપિંગ ટ્રમ્પના સ્વાગત માટે એરપોર્ટ પર હાજર રહ્યા ન હતા.
ચીની ઉપરાષ્ટ્રપતિએ કર્યું સ્વાગત
અમેરિકાના રાષ્ટ્રપ્રમુખ ડોનાલ્ડ ટ્રમ્પ જ્યારે ચીન પહોંચ્યા ત્યારે બેઇજિંગ એરપોર્ટ પર તેમનું સ્વાગત ચીનના ઉપરાષ્ટ્રપ્રમુખ હાન ઝેંગ દ્વારા કરવામાં આવ્યું હતું. ચીની સમાચાર એજન્સી શિન્હુઆના જણાવ્યા અનુસાર, એરપોર્ટ પર ઉપરાષ્ટ્રપ્રમુખ ઝેંગની સાથે બેઇજિંગમાં અમેરિકી રાજદૂત ડેવિડ પર્ડ્યુ અને ચીની વિદેશ મંત્રાલયના ઉચ્ચ અધિકારીઓ પણ હાજર હતા. આ ઉપરાંત, ટ્રમ્પના ભવ્ય સ્વાગત માટે સફેદ અને વાદળી ગણવેશમાં 300 યુવાનો અને એક બેન્ડ પાર્ટીને પણ એરપોર્ટ પર તૈનાત કરવામાં આવી હતી.
શા માટે શી જિનપિંગ એરપોર્ટ પર ન ગયા?
સામાન્ય રીતે ચીની રાષ્ટ્રપ્રમુખ કોઈપણ વિદેશી નેતાના સ્વાગત માટે એરપોર્ટ પર જતા નથી. દક્ષિણ ચીન મોર્નિંગ પોસ્ટ અનુસાર, પ્રોટોકોલ મુજબ વિદેશ મંત્રીએ સ્વાગત માટે જવાનું હોય છે, પરંતુ જિનપિંગે ટ્રમ્પના સન્માનમાં ઉપરાષ્ટ્રપ્રમુખને મોકલીને એક વિશેષ સંકેત આપ્યો છે. અગાઉ રશિયાના પુતિન કે ઉત્તર કોરિયાના કિમ જોંગ ઉન આવ્યા ત્યારે પણ જિનપિંગ એરપોર્ટ પર ગયા ન હતા. નોંધનીય છે કે, ટ્રમ્પે અગાઉ યુએઈ, ઇઝરાયલ, સાઉદી અરેબિયા અને કતારનો પ્રવાસ કર્યો હતો, જ્યાં તે દેશોના રાષ્ટ્રપ્રમુખોએ પોતે એરપોર્ટ પર તેમનું સ્વાગત કર્યું હતું.
આ પણ વાંચો : સુરત મનપામાં ‘અફસરશાહી’: ભાજપ પ્રમુખની સૂચના છતાં અધિકારીઓએ ફોન બંધ કરી ડિમોલિશન કર્યું
આ મુલાકાતના મુખ્ય મુદ્દાઓ અને એજન્ડા
ટ્રમ્પની આ ચીન મુલાકાત વૈશ્વિક રાજનીતિ અને અર્થતંત્ર માટે અત્યંત મહત્ત્વની છે. આ પ્રવાસ દરમિયાન ટ્રમ્પ ચીન સાથે ટેરિફના મુદ્દાઓ પર વાતચીત કરી શકે છે. આર્ટિફિશિયલ ઈન્ટેલિજન્સ (AI) અને રેર અર્થ મિનરલ્સ (Rare Earth Minerals) ને લઈને મહત્વના કરાર થવાની સંભાવના છે. ચીન 2027 સુધીમાં તાઈવાન પર હુમલો કરી શકે તેવી અમેરિકી આશંકાઓ વચ્ચે તાઈવાનના મુદ્દે ચીનનું વલણ સ્પષ્ટ થઈ શકે છે. હાલમાં અમેરિકા ઈરાન સાથેના જંગમાં ફસાયેલું છે, અને ચીન ઈરાનનું નજીકનું મિત્ર હોવાથી આ વિવાદના ઉકેલ માટે પણ વાતચીત થઈ શકે છે. ટ્રમ્પ તેમની સાથે સંરક્ષણ મંત્રી પીટ હેગસેથ, વિદેશ મંત્રી માર્કો રુબિયો અને અમેરિકાના ટોચના ઉદ્યોગપતિઓને પણ ચીન લાવ્યા છે.
જિનપિંગ અને એરપોર્ટ સ્વાગતનો ઇતિહાસ
છેલ્લે 2009 માં જ્યારે શી જિનપિંગ ચીનના ઉપરાષ્ટ્રપ્રમુખ હતા, ત્યારે તેઓ તત્કાલીન અમેરિકી રાષ્ટ્રપ્રમુખ બરાક ઓબામાનું સ્વાગત કરવા એરપોર્ટ પર ગયા હતા. ત્યારથી અત્યાર સુધી તેઓ રાષ્ટ્રપ્રમુખ તરીકે ક્યારેય એરપોર્ટ પર સ્વાગત કરવા ગયા નથી. 2017માં જ્યારે ટ્રમ્પ પ્રથમ વખત ચીન આવ્યા હતા, ત્યારે તેમનું સ્વાગત વિદેશ વિભાગના એક સામાન્ય અધિકારીએ કર્યું હતું. તેની સરખામણીમાં 2026 માં ઉપરાષ્ટ્રપ્રમુખને મોકલવા એ પ્રોટોકોલમાં કરવામાં આવેલો સાધારણ પણ નોંધપાત્ર સુધારો છે.
રેર અર્થ મિનરલ્સનું મહત્ત્વ
ચીન વિશ્વમાં રેર અર્થ મિનરલ્સનો સૌથી મોટો નિકાસકાર છે. અમેરિકા માટે આ ખનીજો ઇલેક્ટ્રિક વાહનો અને સંરક્ષણ ઉપકરણો માટે અનિવાર્ય છે, જે આ ડીલને વ્યૂહાત્મક રીતે અત્યંત મહત્વની બનાવે છે. મધ્ય પૂર્વમાં ઇઝરાયલ અને ઈરાન વચ્ચે વધી રહેલા તણાવના સંદર્ભમાં ટ્રમ્પની આ મુલાકાત ચીન દ્વારા મધ્યસ્થીની નવી શક્યતાઓ ખોલી શકે છે. જો કે ટ્રમ્પ આ મામલે નિવેદન આપી ચુક્યાં છે કે, ઈરાન સાથે યુદ્ધ મામલે તેઓ ચીનની મદદ ઇચ્છતા નથી.
