મૂળ ભાવનગરના રત્નકલાકારને સુરતમાં લગ્નની લાલચ આપી અજાણી યુવતીએ રોકાણના નામે રૂ. 21 લાખ પડાવ્યા | to marry her in Surat and extorted Rs 21 lakh in the name of investment
કામરેજના ખોલવડ ગામના પ્રકાશ સુરાણી સાથે સોશિયલ મીડિયાના માધ્યમથી સંપર્કમાં આવી મુંબઇની અર્પિતા અને ભાવેશ સરે ખેલ પાડયો
બારડોલી, રાજકોટ : સુરત જિલ્લાના કામરેજ વિસ્તારમાં રહેતાં રત્ન કલાકારને સોશિયલ મીડિયાના માઘ્યમથી સંપર્કમાં આવેલી અજાણી યુવતીએ લગ્નની લાલચ આપી ફોરેક્સ ટ્રેડિંગના બહાને રૂ. 21.55 લાખની ઓનલાઇન છેતરપિંડી કરી હતી. યુવતીએ મિત્ર સાથે મળી રોકાણના નામે કટકે-કટકે રૂપિયા પડાવી લીધા હતા.
કામરેજના ખોલવડ ગામે બંસરી લકઝરીયામા પ્રકાશ લલ્લુભાઈ સુરાણી (ઉ.વ. 43, મૂળ રહે.અમૃતવેલ, જી.ભાવનગર) પરિવાર સાથે રહે છે અને સુરત ખાતે રત્નકલાકાર તરીકે કામ કરે છે. પ્રકાશ સુરાણીની પત્ની મનીષાનું 4 મહિના પહેલા અવસાન થયું હતું અને બે દીકરી તથા દીકરા સાથે રહે છે. પ્રકાશ સુરાણી ગત ઓક્ટોબર માસમાં ફેસબુક પર રિલ્સ જોતાં હતાં ત્યારે અર્પિતા પટેલ નામની યુવતી સાથે મિત્રતા થઈ હતી. વાતચીત આગળ વધતા અર્પિતાએ પોતાની ઓળખ મુંબઈના મીરા રોડની રહેવાસી તરીકે આપી હતી અને પ્રકાશ સાથે લગ્ન કરવાની ઈચ્છા વ્યક્ત કરી વિશ્વાસ જીતી લીધો હતો. પ્રકાશ સુરાણીનો વિશ્વાસ કેળવ્યા બાદ અર્પિતાએ પોતે ફોરેક્સ ટ્રેડિંગમાં મોટો નફો મેળવતી હોવાનું જણાવી પ્રકાશને પણ રોકાણ કરવા લલચાવ્યા હતા. અર્પિતાએ ભાવેશ સર નામના શખ્સનો સંપર્ક કરાવી સોનીકોઈ નામની વેબસાઈટ અને અન્ય એપ્લિકેશન દ્વારા રોકાણ કરાવવાનું શરૂ કર્યું હતું. શરૂઆતમાં રૂ. 30,000ના રોકાણ સામે વળતર આપીને પ્રકાશનો વિશ્વાસ સંપાદિત કર્યો હતો. વધુ નફાની લાલચમાં પ્રકાશે તા. 05-11-2025થી તા.20-11-2025 દરમિયાન અલગ-અલગ તારીખે આરટીજીએસ અને ફોન-પે દ્વારા કુલ રૂ. 21,55,092 ટ્રાન્સફર કર્યા હતા. જ્યારે પ્રકાશ પોતાનો નફો વિડ્રો (ઉપાડવા)નો પ્રયાસ કર્યો ત્યારે એપ્લિકેશનમાં એરર હોવાનું અને તે દૂર કરવા માટે વધુ રૂ. 6 લાખની માંગણી કરવામાં આવી હતી. જેથી શંકા જતાં પ્રકાશે તપાસ કરી તો પોતાની સાથે છેતરપિંડી થઈ હોવાનું જણાયું હતું. જે અંગે પ્રકાશે સાયબર હેલ્પલાઇન પર ફરિયાદ નોંધાવ્યા બાદ કામરેજ પોલીસે અર્પિતા પટેલ અને ભાવેશ સર વિરૂદ્ધ આઈ.ટી. એક્ટ હેઠળ ગુનો નોંઘ્યો છે.
