ટ્રેનોના કોચમાં પાણીની ફરિયાદો ટાળવા કેમેરા મૂકાયા | Cameras installed in train coaches to avoid water complaints
વડોદરા રેલવે સ્ટેશન ખાતે વોટર વોચ સિસ્ટમ શરૂ કરાઈ છે. આ સિસ્ટમ અંતર્ગત ટ્રેનોમાં પાણી ભરવાની સમગ્ર પ્રક્રિયા સીસીટીવી કેમેરાની નજર હેઠળ રહેશે.
રેલવે સ્ટેશનના પ્લેટફોર્મ નંબર ૧થી ૬ ૫૨૫૨ ૧૬ હાઈ-રિઝોલ્યુશન કેમેરા ઇન્સ્ટોલ કરાયા છે, જે દિવસ-રાત ટ્રેનના કોચમાં પાણી ભરવાની ગતિવિધિ પર નજર રાખશે
રેલવે અધિકારીઓના જણાવ્યા અનુસાર, આ કેમેરા નાઈટ વિઝન ટેકનિકથી સજ્જ છે. આનાથી જાણી શકાશે કે કોચમાં પાણી ભરવાનું કાર્ય યોગ્ય રીતે થઈ રહ્યું છે કે નહીં.અગાઉ મુસાફરો તરફથી વારંવાર ફરિયાદો આવતી હતી કે કોચમાં પૂરતું પાણી ભરવામાં આવ્યું નથી અથવા સ્ટાફની બેદરકારીના કારણે પ્રક્રિયા અધૂરી રહી ગઈ છે.
હવે કંટ્રોલ રૂમમાં બેઠેલા અધિકારીઓ રિયલ ટાઇમમાં સમગ્ર પ્રક્રિયા જોઈ શકશે અને કોઈ પણ ગડબડ થતાં તાત્કાલિક પગલાં લઈ શકશે. આગામી સમયમાં આ સિસ્ટમ અન્ય મુખ્ય સ્ટેશનો પર પણ લાગુ કરવાની યોજના છે.
જો ક્યાંક પાઇપલાઇનમાં લીકેજ હોય અથવા પાણી ઓવરફ્લો થઈ રહ્યું હોય, તો કેમેરા તરત જ તેને કેપ્ચર કરી લેશે અને મેઈન્ટેનન્સ ટીમને એલર્ટ મોકલી દેવાશે. વોટર પાઈપલાઈન વિસ્તારની આસપાસ અનધિકૃત વ્યક્તિઓની અવરજવર પર નજર રાખવાનું સરળ બનતા સ્ટેશન પરિસરની સુરક્ષા વધુ મજબૂત બનશે.
