ધર્મજ ગામમાં કારનો કાચ તોડી સોનાના દાગીના સહિત 70 હજારના મત્તાની ચોરી | ધર્મજ ગામમાં કારનો કાચ તોડી સોનાના દાગીના સહિત 70 હજારના મત્તાની ચોરી

મુંબઈનો પરિવાર લગ્ન પ્રસંગ માટે આવ્યો હતો

પેટલાદ ગ્રામ પોલીસ દ્વારા અજાણ્યા શખ્સો સામે ગુનો નોંધી તેમને ઝડપી પાડવા માટે તજવીજ હાથ ધરાઈ

આણંદ: પેટલાદ તાલુકાના ધર્મજ ગામે આવેલા એક પાર્ટી પ્લોટ નજીક બોરસદ તરફ જવાના માર્ગ ઉપર પાર્ક કરેલી એક કારનો કાચ તોડી અજાણ્યા તસ્કરો કારમાંથી સોનાના દાગીના, કપડાં અને ટ્રોલી બેગ મળી કુલ રૂપિયા ૭૦ હજારના મત્તાની ચોરી કરી ફરાર થઈ ગયા હતા. પેટલાદ ગ્રામ્ય પોલીસે અજાણ્યા શખ્સો વિરુદ્ધ ચોરીનો ગુનો નોંધી વધુ તપાસ હાથ ધરી છે.

મૂળ ખાનપુરના અને હાલ મુંબઈના ભિવંડી ખાતે રહેતા રાજેશભાઈ અરવિંદભાઈ પટેલ સંબંધીને ત્યાં લગ્ન પ્રસંગ હોવાથી પરિવાર સાથે વતન ખાતે આવ્યા હતા. તારીખ ૨૦મી જાન્યુઆરીના રોજ તેઓ પત્ની સાથે પોતાની કાર લઈને ખંભાત ખાતે લગ્ન પ્રસંગમાં ગયા હતા. જ્યાંથી લગ્ન પ્રસંગ પતાવીને સાંજના સુમારે ધર્મજ ખાતે આવ્યા હતા. ધર્મજ ખાતેના દેવ પાર્ટી પ્લોટમાં યોજાયેલ લગ્ન સમારોહમાં જવા માટે તેઓએ પોતાની કાર બોરસદ તરફના રોડ ઉપર પાર્ક કરી હતી. લગ્ન પતાવ્યા બાદ ઘરે જવા માટે તેઓ કાર પાસે પહોંચ્યા ત્યારે પાછળના ભાગનો કાચ તૂટેલો જોયો હતો. જેથી તપાસ કરતા કારમાં મુકેલ કપડાં, ટ્રોલી બેગ જેમાં મુલેલા સરસામાન મળી કુલ રૂપિયા ૭૦ હજારની મત્તાની ચોરી થઈ હોવાનંે માલુમ પડયું હતું. આસપાસમાં તપાસ કરતાં કંઈ મળી આવ્યું નહોતું. જેથી રાજેશભાઈ પટેલે પેટલાદ ગ્રામ્ય પોલીસ મથકમાં ફરિયાદ નોંધાવતા પોલીસે ગુનો નોંધી વધુ તપાસ હાથ ધરી છે