શાપર પોલીસ મથકમાં યુવતીની ધમાલ, બે મહિલા પોલીસ ઘાયલ | A girl rioted at Shapar police station two female police officers were injured
તમારા બધાના પટ્ટા ઉતરાવી નાખીશ
ઘણા સમય સુધી પોલીસ સામે એલફેલ બોલી તોછડું વર્તન કર્યું, ફરજમાં રૂકાવટની ફરિયાદ
રાજકોટ: શાપર પોલીસ મથકમાં કિર્તીબેન રાઠોડ નામની યુવતીએ ધમાલ મચાવી મહિલા કોન્સ્ટેબલ અને હેડ કોન્સ્ટેબલને ઘાયલ કરી દીધાની ફરિયાદ નોંધાઈ છે. પોલીસે ફરજમાં રૂકાવટ સહિતની કલમો હેઠળ ગુનો નોંધી તપાસ હાથ ધરી છે.
શાપરમાં પીએસઓ અને કોમ્પ્યુટર ઓપરેટર તરીકે ફરજ બજાવતાં કોન્સ્ટેબલ પુજાબેન રાઠોડે નોંધાવેલી ફરિયાદમાં જણાવ્યું છે કે આજે પીએસઓ હેતલબેન મીઠાપરા સાથે ફરજ પર હતા. બપોરે કિર્તીબેન પોલીસ સ્ટેશનના ગ્રાઉન્ડમાંથી બુમાબુમ કરી પીએસઓ ટેબલ પાસે ધસી આવ્યા હતા. આવીને કહ્યું કે મારા મિત્રને કેમ પોલીસ મથકમાં બેસાડયો છે. અરજીના કામે બેસાડયાનું કહેતાં જોર-જોરથી બોલવાનું ચાલુ રાખ્યુ હતું. જેથી તેને જે રજુઆત હોય તે શાંતિથી કરવાનું કહ્યું હતું.
એટલું જ નહીં હેડ કોન્સ્ટેબલ હેતલબેન, સમજુબેન ગમારા અને કોન્સ્ટેબલ કિંજલબેન માટીયાએ પણ સમજાવવાનો પ્રયાસ કર્યો હતો. આમ છતાં જીભાજોડી કરી કહ્યું કે તમે મને ઓળખતાં નથી, મારા માણસોને ભેગા કરી તમારા વિરૂધ્ધ ખોટી રજુઆતો કરી બધાના પટ્ટા ઉતરાવી નાખીશ. સાથો-સાથ ધમાલ મચાવવાનું ચાલુ રાખ્યું હતું.
વારંવાર સમજાવવાના પ્રયાસો કર્યા હતા. જે નિષ્ફળ ગયા હતા. તે વખતે બીજા પોલીસમેનો પણ આવી પહોંચ્યા હતા. કિર્તીબેને અચાનક ઉશ્કેરાઈ તેની સાથે હાથાપાઈ કરી, જોરથી બાથમાં લઈ, હાથ પકડીને, ધક્કો મારી, ફંગોળી દીધા હતા.
એવુ પણ કહ્યું કે આજ પછી કોઈ દિવસ મારી સામે આવી છો તો મજા નહીં આવે. પોલીસ સ્ટાફ સાથે તોછડું વર્તન કરી, તુંકારો આપી, એલફેલ બોલવાનું ચાલુ રાખ્યું હતું. હું દવા પીને મરી જઈશ અને તમારા બધાના ખોટા નામ ફીટ કરી દઈશ, તમારા વિરૂધ્ધ રેલી કાઢીશ તેવી ગર્ભિત ધમકીઓ આપી હતી. તેને ઉપરાંત હેડ કોન્સ્ટેબલ સમજુબેનને મૂંઢ ઈજા થઈ હતી.
