પેટ્રોલ ભાવ વધારા ઇફેક્ટ : EV વાહનોના ભાવમાં પણ ટૂંક સમયમાં વધારો થશે | Petrol price hike effect: Prices of EV vehicles will also increase soon
EV Vehicle Price : ઈરાન, ઇઝરાયેલ અને અમેરિકા વચ્ચે ચાલી રહેલા યુદ્ધના કારણે પેટ્રોલ-ડીઝલની સર્જાતી ખેંચ અને ઇંધણના ભાવો વધી રહ્યા છે. પરિણામે ઈલેક્ટ્રિક વાહનોની માંગ પણ વધી છે. પરિણામે ઇલેક્ટ્રીક વાહન બનાવતી કંપનીઓ આગામી સમયમાં ભાવ વધારો કરી રહી છે.
દેશભરમાં ઇલેક્ટ્રિક વાહનો (EV) અપનાવવાની ગતિ છેલ્લા કેટલાક વર્ષોમાં નોંધપાત્ર રીતે વધી છે. પેટ્રોલ અને ડીઝલના સતત વધતા ભાવ, પર્યાવરણ પ્રત્યે વધતી જાગૃતિ તેમજ સરકાર દ્વારા આપવામાં આવતી વિવિધ પ્રોત્સાહક યોજનાઓના કારણે ઇલેક્ટ્રિક ટુ-વ્હીલર, થ્રી-વ્હીલર અને ફોર-વ્હીલરની માંગમાં સતત વધારો જોવા મળી રહ્યો છે. ત્યારે હવે ઇલેક્ટ્રિક વાહન ખરીદવા ઇચ્છતા ગ્રાહકો માટે માઠા સમાચાર સામે આવ્યા છે. આગામી દિવસોમાં વિવિધ કંપનીઓ દ્વારા ઇલેક્ટ્રિક વાહનોના ભાવમાં ધરખમ વધારો કરવામાં આવનાર હોવાથી ગ્રાહકોને વધુ રકમ ચૂકવવી પડશે.
ઈલેક્ટ્રિક વાહન ઉદ્યોગ સાથે સંકળાયેલા સૂત્રોના જણાવ્યા અનુસાર બેટરી, લિથિયમ સેલ, ઇલેક્ટ્રોનિક ઘટકો અને અન્ય કાચા માલના ખર્ચમાં થયેલા વધારાને કારણે ઉત્પાદક કંપનીઓ પર ખર્ચનું ભારણ વધી રહ્યું છે. આ ઉપરાંત પરિવહન ખર્ચ, ઉત્પાદન ખર્ચ અને સપ્લાય ચેઇન સંબંધિત પડકારોને કારણે પણ કંપનીઓ ભાવવધારો કરવાનો નિર્ણય લઈ રહી છે. પરિણામે ઇલેક્ટ્રિક સ્કૂટર, બાઇક તેમજ કારના ભાવમાં વિવિધ મોડેલ મુજબ વધારો જોવા મળી શકે છે.
વિશેષજ્ઞોના મતે ઇલેક્ટ્રિક વાહનો માટે અગાઉ કેન્દ્ર અને રાજ્ય સરકારો દ્વારા આપવામાં આવતી કેટલીક સબસીડી અને પ્રોત્સાહક યોજનાઓમાં ઘટાડો થવાથી પણ બજાર પર અસર પડી રહી છે. કેટલાક રાજ્યોમાં સબસીડીની સમયમર્યાદા પૂર્ણ થવા અથવા યોજનાઓમાં ફેરફાર થવાને કારણે ગ્રાહકોને અગાઉ મળતો લાભ હવે મર્યાદિત થઈ શકે છે. તેના કારણે વાહનની અંતિમ ખરીદી કિંમતમાં વધારો થવાની શક્યતા વધુ બની છે.
ગુજરાત સહિત દેશના વિવિધ શહેરોમાં ઇલેક્ટ્રિક ટુ-વ્હીલરનું વેચાણ ઝડપથી વધી રહ્યું છે. ખાસ કરીને યુવાનો અને રોજિંદા ઉપયોગ માટે ઓછા ખર્ચે વાહન ચલાવવા ઇચ્છતા લોકો ઇલેક્ટ્રિક વિકલ્પો તરફ વળી રહ્યા છે. જોકે ભાવવધારાના કારણે આગામી દિવસોમાં કેટલાક ગ્રાહકો ખરીદીનો નિર્ણય મુલતવી રાખે તેવી શક્યતા પણ વ્યક્ત કરવામાં આવી રહી છે.
વાહન ડીલરોનું કહેવું છે કે જે ગ્રાહકો ઇલેક્ટ્રિક વાહન ખરીદવાનું આયોજન કરી રહ્યા છે તેઓએ ભાવવધારો અમલમાં આવે તે પહેલાં ખરીદી પૂર્ણ કરવાથી વર્તમાન કિંમતોનો લાભ મેળવી શકે છે. બીજી તરફ નિષ્ણાતોનું માનવું છે કે શરૂઆતમાં ભાવમાં થોડો વધારો થવા છતાં લાંબા ગાળે ઇંધણ અને જાળવણી ખર્ચમાં થતી બચતને કારણે ઇલેક્ટ્રિક વાહનો હજુ પણ આર્થિક રીતે ફાયદાકારક વિકલ્પ સાબિત થઈ શકે છે. તેથી ભાવવધારા છતાં EV ક્ષેત્રનો વિકાસ અને માંગ આગામી સમયમાં યથાવત્ રહેવાની શક્યતા વ્યક્ત કરવામાં આવી રહી છે.
