મોરબીમાં ભાડું ન ચૂકવી શકતા સગીર દીકરી-પત્નીને નરાધમને હવાલે કરનાર આરોપીઓ જેલ હવાલે | morbi crime news house owner tenant arrested pocso case
Morbi News: ઔદ્યોગિક નગરી મોરબીમાંથી સભ્ય સમાજને ધ્રુજાવી દેનારી અને માનવતાને કલંકિત કરનારી એક અત્યંત ચોંકાવનારી ઘટના સામે આવી છે. આર્થિક સંકડામણ અને મકાનનું ભાડું ન ચૂકવી શકવાના કારણે એક નરાધમ ભાડૂઆત પતિએ પોતાની જ પત્ની અને સગીર વયની દીકરીને મકાન માલિકના હવાલે કરી દીધી હતી. મકાન માલિકે ભાડાની વસૂલાતના નામે માતા અને પુત્રી બંને પર શારીરિક અત્યાચાર ગુજારી દુષ્કર્મ આચર્યું હતું. આ ચકચારી મામલે ભોગ બનનાર મહિલાની માતાએ હિંમત દાખવી પોલીસ ફરિયાદ નોંધાવતા સમગ્ર પાપલીલાનો પર્દાફાશ થયો છે.
ભાડાના પૈસાના બદલામાં પત્ની અને દીકરીને સોંપી દીધી!
પોલીસ તપાસમાંથી બહાર આવેલી વિગતો મુજબ, મોરબી શહેરમાં એક પરિવાર લાંબા સમયથી ભાડે મકાન રાખીને રહેતો હતો. ઘરના મોભી (પતિ) પર મકાનનું ભાડું ચડી ગયું હતું. આર્થિક ભીંસના કારણે તેની પાસે મકાન માલિકને ચૂકવવા માટે પૈસા ન હતા. મકાન માલિક જ્યારે ભાડાની કડક ઉઘરાણી કરવા આવ્યો, ત્યારે નરાધમ પતિએ ભાડાના પૈસા માંડવાળ કરવાના બદલામાં પોતાની પત્ની અને સગીર વયની પુત્રીને નરાધમને હવાલે કરી દીધી હતી. આ નરાધમ પતિની સંમતિ મળ્યા બાદ મકાન માલિકે હેવાનિયતની તમામ હદો વટાવી દીધી હતી અને સગીર દીકરી તેમજ તેની માતા બંને પર હુમલો કરી દુષ્કર્મ આચર્યું હતું.
POCSO સહિતની ગંભીર કલમો હેઠળ ગુનો દાખલ
આ નરક સમાન અત્યાચારનો ભોગ બનેલી મહિલાએ આખરે પોતાની માતાને આપવીતી જણાવી હતી. જે બાદ ભોગ બનનાર મહિલાની માતાએ મોરબી એ ડિવિઝન પોલીસ મથકમાં નરાધમ જમાઈ અને મકાન માલિક વિરુદ્ધ ફરિયાદ નોંધાવી હતી. પોલીસે ઘટનાની ગંભીરતા અને ભોગ બનનાર દીકરી સગીર વયની હોવાથી, ગુનામાં તુરંત જ દુષ્કર્મ (Rape) અને પોક્સો (POCSO) એક્ટ સહિતની કડક કાનૂની કલમો હેઠળ કુલ 3 શખ્સો સામે ગુનો દાખલ કર્યો હતો.
6 મહિના પહેલાની ઘટના
આ ચકચારી કેસ અંગે મોરબીના ડીવાયએસપીએ પત્રકાર પરિષદ યોજીને સત્તાવાર વિગતો આપી હતી. તેમણે જણાવ્યું કે, માતા અને સગીર દીકરી સાથે દુષ્કર્મની આ હૃદયદ્રાવક ઘટના આશરે 6 મહિના પહેલા બની હતી. મોરબી એ ડિવિઝન પોલીસ દ્વારા ટેકનિકલ સોર્સ અને બાતમીદારોની મદદથી ગણતરીના કલાકોમાં જ 2 મુખ્ય આરોપીઓ ( પતિ અને મકાન માલિક) ને દબોચી લીધા હતા. પોલીસે બંને નરાધમોને કોર્ટ સમક્ષ રજૂ કરતા, અદાલતે ગુનાની ભયાનકતા જોઈને બંને આરોપીઓને તાત્કાલિક જેલ હવાલે (Judicial Custody) કરવાનો હુકમ કર્યો છે. જ્યારે આ ગુનામાં સંડોવાયેલા અન્ય એક સહ-આરોપીને ઝડપી પાડવા માટે પોલીસે અલગ-અલગ ટીમો બનાવીને ચક્રો ગતિમાન કર્યા છે.
