છોકરાઓની તકરારમાં પોલીસમેન સહિતનાઓએ તરૂણને ઢોર માર માર્યો | Policeman and others beat up a young man in a dispute between boys
બજરંગવાડી સર્કલ પાસેની ઘટનાં
આરોપી પોલીસ હેડ ક્વાર્ટરમાં ફરજ બજાવતાં હોવાનું ખુલ્યું, આઇકાર્ડ બતાવી કહ્યું ‘હતું હું તારો બાપ છું’
રાજકોટ: શિતલ પાર્ક નજીક શ્યામનગર-૪માં રહેતાં એક તરૂણને પોલીસમેન સહિતનાં આઠેક આરોપીઓએ ભેગા મળી બેફામ બની મારકુટ કર્યાની ફરિયાદ ગાંધીગ્રામ પોલીસ મથકમાં નોંધાઇ છે. આ ઘટનામાં આરોપી તરીકે પોલીસમેન હોવાથી ચાર દિવસ બાદ પોલીસે ફરિયાદ નોંધ્યાનો આક્ષેપ થયો છે.
લેડીસ સલૂન ચલાવતાં રિધ્ધીબેન અતુલભાઇ ભડેણીયા (ઉ.વ.૩૨)એ નોંધાવેલી ફરિયાદમાં જણાવ્યું છે કે, તેનો ભાઇ પ્રિન્સ તેના મિત્રો સાથે ગઇ તા.૨૯ના રોજ ક્રિકેટ રમવા બજરંગવાડી ગાર્ડનમાં ગયો હતો. તે વખતે તેના મિત્ર મિતનો મિત્ર કે જે સગીર છે તે અને તેનો ભાઇ બેટ ફેરવતાં હતાં. જે બેટ તેના ભાઇને વાગતાં બંને સાથે ઝઘડો થતાં તેનો ભાઇ ત્યાંથી નિકળી ગયો હતો.
ત્યાર પછી તેનો ભાઇ મિત્ર સાથે ત્રિકોણ બાગ પાસે ખરીદી કરતો હતો ત્યારે ઝઘડો કરનાર સગીરે કોલ કરી ગાળો ભાંડી હતી. એટલું જ નહીં સમાધાન માટે બજરંગ વાડી સર્કલ પાસે બોલાવ્યા બાદ સગીરનાં પિતા તરીકે ઓળખ આપનાર સંદીપસિંહે કેમ મારા દીકરાને ગાળો આપતો હતો તેમ કહીં તેના ભાઇનાં વાળ ખેંચ્યાં હતા. જ્યારે સગીરે તેને ગડદાપાટુંનો માર માર્યો હતો. તેના ભાઇનો મિત્ર દિક્ષીત વચ્ચે પડતાં તેને સંદીપસિંહે સાઇડમાં બેસાડી તેના ભાઇનાં વાળ પકડી, ટીશર્ટ કઢાવી, તમાચા ઝીંકી, માથાના ભાગે ઢીકા માર્યા હતા.
આટલેથી નહીં અટકતાં તેના ભાઇને ડાબી આંખ ઉપર નેણનાં ભાગે કડંુ મારી દીધું હતું. અન્ય છ આરોપીઓએ પણ તેના ભાઇને ગડદાપાટુંનો માર મારી બેટ વડે પણ હુમલો કર્યો હતો. આખરે સંદીપસિંહે પોલીસનું કાર્ડ બતાવી હું તારો બાપ છું, થાય તે કરી લેજે, બીજી વાર બગીચામાં રમવા દેખાણો તો પાછો મારીશ તેમ કહીં ચાલતી પકડી હતી.
ફરિયાદમાં રિધ્ધીબેને આગળ જણાવ્યું છે કે, આ બાબતની જાણ થતાં તે સ્થળ પર પહોંચ્યા હતા. તે ઝઘડો કરનાર તરૂણનાં ઘરે જતાં સંદીપસિંહ અન્ય પાંચેક માણસો સાથે બાકડે બેઠા હતાં. તેને કેમ મારા ભાઇને માર્યો તેમ પુછતાં તારે જ્યાં પોલીસ ફરિયાદ કરવી હોય ત્યાં કરી લેજે તેમ કહીં તેની સાથે પણ ઝઘડો કર્યો હતો. એટલું જ નહીં ધક્કો મારી અહીંથી નીકળ તેમ કહીં દીધું હતું. તેના ભાઇને નેણનાં ભાગે ઇજા થતાં સારવાર લીધી હતી. જેમાં બે ટાંકા લેવા પડયાં હતાં.
પોલીસે જણાવ્યું કે આરોપી સંદીપસિંહ હેડ ક્વાર્ટરમાં ફરજ બજાવે છે. ઝઘડામાં તેનો પુત્ર નહીં પરંતુ ભત્રીજો હોવાની માહિતી મળી છે. આ બંને ઉપરાંત અન્ય છ અજાણ્યા શખ્સો સામે ફરિયાદ નોંધાઇ છે.
– આરોપી પોલીસમેનને બચાવવા પોલીસે ઘણાં ધમપછાડા કર્યા
રાજકોટ: ફરિયાદી રિધ્ધીબેને જણાવ્યું કે, આ કેસમાં પોલીસ ફરિયાદ લેતી ન હતી. અનેક ધક્કા ખવડાવ્યા હતા. મામલો પીઆઇ એચ.પી.ગઢવી સુધી પહોંચતા તેમની સુચનાથી આખરે ગઇકાલે રાત્રે પોલીસે ફરિયાદ નોંધી હતી. ઉલ્લેખનીય છે કે આ પ્રકારનાં સામાન્ય કિસ્સાઓમાં પોલીસ તત્કાળ ફરિયાદ નોંધી લે છે પરંતુ આ કિસ્સામાં આરોપી તરીકે પોલીસમેન હોવાથી તેને બચાવવા માટે ગાંધીગ્રામ પોલીસ મથકનાં સંબંધીત સ્ટાફે ઘણાં ધમપછાડા કર્યા હતા. પરંતુ ફરિયાદી મક્કમ રહેતાં મજબૂરીવશ પોલીસે ગુનો દાખલ કરવો પડયો હતો.
