પૂર્વ ધારાસભ્ય ભૂષણ ભટ્ટનો ભ્રષ્ટાચાર નડયો, ૫૪ વર્ષના ઈતિહાસમાં પહેલી વખત ખાડીયામા ભાજપની પેનલ હારી | Former MLA Bhushan Bhatt’s corruption case exposed

અમદાવાદ,મંગળવાર,28 એપ્રિલ,2026

ખાડીયાના ૫૪ વર્ષના ઈતિહાસમાં મંગળવારે મેજર અપસેટ સર્જાયો.
કોંગ્રેસના તમામ ચાર ઉમેદવારોનો વિજય થતા કોંગ્રેસની પેનલ જીતી જતા ખાડીયાના
રહીશોની સાથે તમામ માટે આ પરિણામ આઘાતજનક હતા.ખાડીયામા ભાજપની પેનલ હારવા પાછળ
પૂર્વ ધારાસભ્ય ભૂષણ ભટ્ટનો ભ્રષ્ટાચાર જવાબદાર બન્યો છે.ભૂષણ ભટ્ટના કારણે જ
ખાડિયાની મોટાભાગની પોળો ખાલી થઈ ગઈ.રહેણાંક મકાનો સસ્તામા પડાવી લઈ કોમર્શિયલ
ગોડાઉનો ખડકી દેવામા આવ્યા છે.

૧૯૭૨માં ખાડીયા ગોલવાડમા જનસંઘના કાર્યાલયની સ્થાપના કરવામા
આવી હતી. જનસંઘના સમયે સ્વ.અશોક ભટ્ટ દિપકના પ્રતિક ઉપર પ્રથમ વખત ચૂંટણી લડી
જીત્યા હતા. જે પછી ૧૯૮૭માં ભાજપની સ્થાપના થયા પછીથી વર્ષ-૨૦૨૧ સુધીની તમામ
મ્યુનિસિપલ કોર્પોરેશનની ચૂંટણીમાં ભાજપના ઉમેદવારો જીત મેળવતા હતા. સરની
કાર્યવાહીના પગલે ખાડીયા વોર્ડમાંથી ૨૪૬૭૮ મતદાર ઓછા થઈ જતા ૭૩૦૯૮ મતદાર રહેતા
અગાઉથી જ ખાડીયા વોર્ડમાં આ વખતની મ્યુનિસિપલ કોર્પોરેશનની ચૂંટણીમા કાંઈ નવા જુની
થશે એવો સંદેહ તો પહેલેથી જ વ્યકત કરાયો હતો. પરંતુ આટલી હદે ખરાબ પરિણામ ખાડીયા
વોર્ડનુ આવશે.એની કોઈએ કલ્પના કરી નહતી.ખાડીયામાં છેલ્લા કેટલાક વર્ષોથી હરીફ ઉભો
થવો ના જોઈએ એ પ્રકારની રાજનિતી ભાજપના કેટલાક નેતાઓ પડદા પાછળથી કરી રહયા છે. આ
કારણથી પાંચ વર્ષમાં બુચમેન તરીકે જાણીતા બનેલ પંકજ બી ભટ્ટ જો બીજી ટર્મ માટે
કોર્પોરેટર બની જાય તો ભવિષ્યમાં જમાલપુર-ખાડીયા વિધાનસભા બેઠક માટેના દાવેદાર પણ
બની જાય.આ કારણથી ભાજપે ઉમેદવારોના નામની જાહેરાત કરી એ સાથે જ ભાજપના જ અમુક
નેતાઓએ કેટલાકને અપક્ષ ઉમેદવાર તરીકે  ઉભા
રાખીને ભાજપના ઉમેદવારોને હરાવવાનો કારસો રચ્યો હોવાનુ પણ ખાડીયાના રહીશોમા  ચર્ચાઈ રહયુ છે.વાસ્તવિકતા જે પણ હોય હકીકત એ
છે કે પહેલા ખાડીયા વિધાનસભાનુ સ્વતંત્ર અસ્તિત્વ હતુ તે જતુ રહયુ. હવે ખાડીયા
વોર્ડમાંથી ભાજપની પેનલ પણ જતી રહી.