રાજ્યના 6 મહાનગરોમાં 57 ટકાથી વધારે મહિલાઓ મતદાન નથી કરતી | More than 57 percent of women do not vote in 6 metros of the state
નેતાઓ પ્રત્યે શહેરી પુરૂષો કરતા સ્ત્રીઓને વધુ અણગમો : આશ્ચર્યજનકઃ રાજકોટ, અમદાવાદ, સુરત જેવા મેગાસિટી કરતા નાના નગરો, ગામડામાં સ્ત્રી મતદાન 20 ટકા જેટલુ વધારે રહ્યુ
રાજકોટ, : ગુજરાતમાં ગત દોઢ દાયકામાં યોજાયેલી મહાનગર પાલિકાઓની ત્રણ ચૂંટણીના મતદાનનું વિશ્લેષણ કરતા પંચાયત કે નગરપાલિકા વિસ્તાર કરતા અમદાવાદ,સુરત, વડોદરા, રાજકોટ, ભાવનગર, જામનગર એ 6 મહાનગરોમાં મતદારો સતત ઉદાસીન રહ્યા છે અને તેમાં પણ પુરૂષો કરતા સ્ત્રીઓની મતદાનની ટકાવારી નોંધપાત્ર નીચી રહી છે. ઈ.સ. 2010, 2015 અને ગત 2021માં યોજાયેલી ચૂંટણીમાં રાજ્યમાં મતાધિકાર ધરાવતી મહિલાઓમાં 57 ટકાથી વધુએ મતદાન કરવાનું જ ટાળ્યું છે. ઉલ્લેખનીય છે કે ઈ.સ. 2021 સુધી રાજ્યમાં 6 મહાપાલિકાની ચૂંટણી એક સાથે થતી અને આ વખતે નવી 9 ઉમેરાતા 15નું મતદાન થશે.
આ મહાનગરોમાં ઈ. 2010માં મહિલા મતદાન માત્ર 41.29 ટકા જેમાં સૌથી ઓછું રાજકોટમાં માત્ર 38.37 ટકા સ્ત્રી મતદાન થયું હતું. ઈ.સ. 2015માં 6 મનપાનું સરેરાશ સ્ત્રી મતદાન 41.75 ટકા હતું જેમાં સુરતમાં સૌથી ઓછું માત્ર 36.58 ટકા સ્ત્રીઓએ જ મત આપ્યો હતો. ગત ચૂંટણી ઈ.સ. 2021માં સરેરાશ મહિલા મતદાન માત્ર 42.60 ટકા અને સૌથી ઓછું અમદાવાદમાં માત્ર 38.84 ટકા સ્ત્રી મતદાન નોંધાયું હતું.
સ્ત્રીઓની નોકરી-વ્યવસાયમાં સંખ્યા સતત વધી રહી છે પરંતુ, તે મૂજબ મતદાનમાં વધારો થતો નથી. રાજ્યમાં દર 1000 પુરૂષોએ હાલ અંદાજે 919થી 920 મહિલાઓની સંખ્યા છે. ગત ચૂંટણીમાં મતદાન થયું તેમાં દર 1000 પુરૂષોએ માત્ર 772 સ્ત્રીઓએ મતદાન કર્યું હતું.
બીજી તરફ, ગત ચૂંટણીનું જ ઉદાહરણ લઈએ તો મહાનગરોમાં સ્ત્રી મતદાન માત્ર 42.60 ટકા થયું જ્યારે ગ્રામ્ય વિસ્તારમાં એટલે કે 31 જિલ્લા પંચાયતોમાં સ્ત્રી મતદાન 64.36 ટકા રહ્યું હતું અર્થાત્ મોટા શહેરો કરતા ગામડામાં 20 ટકા વધારે! આ જ રીતે મ્યુનિસિપાલ્ટી અર્થાત્ નાના શહેરોમાં પણ સ્ત્રીઓનું સરેરાશ મતદાન 56.24 ટકા રહ્યું હતું.
મેગાસિટીઝમાં મહિલા મતદાન નિરસ રહેવાના સંભવિત કારણો
આજના નેતાઓને ચૂટવા માટે મહિલાઓમાં ઉત્સાહનો અભાવ અને અણગમા માટે સંભવિત મુખ્ય કારણોમાં (1) ખાદ્યતેલથી માંડીને મસાલા સહિત ખાદ્યચીજોમાં અને રસોઈ ગેસ વગેરેમાં વધતા ભાવ (2) મોંઘુદાટ શિક્ષણ (3) લાખોનો ખર્ચ કરીને સંતાનો ભણ્યા પછી પર્યાપ્ત પગારે નોકરી ન મળવી અને લગ્નમાં વિલંબ (4) રાજકારણમાં ગયા પછી, પદ મળ્યા પછી બેરોજગાર કે અલ્પશિક્ષિત નેતાઓ કરોડોમાં આળોટતા હોવાના જોવા-જાણવા મળતા કિસ્સા જેથી ‘આપણા મતથી આ લોકો જ માલદાર થાય છે’તેવી નિરાશા (5) મોટા શહેરોમાં લુખ્ખા તત્વો સીનસપાટા કરતા વાહનોમાં નીકળે, ખુલ્લેઆમ ગુંડાગીરીથી માંડીને ટ્રાફિક જામના પ્રશ્નો (6) ટેક્સ નિયમિત ચૂકવવા છતાં સારા-સમથળ રસ્તા નહીં, દર ચોમાસે શેરીમાં પાણી ભરાઈ જાય, ક્યાંક ગંદકીના ગંજ,ગંદુ કે અપુરતું પાણી વિતરણ વગેરે પ્રશ્નો પણ મહિલાને વધુ સ્પર્શે છે.
