ભોગાત નજીક જીપ પલ્ટી ખાઇ જતાં યુવાનનું મોત, 6 ઘાયલ | Youth dies 6 injured as jeep overturns near Bhogat
પોરબંદર-દ્વારકા હાઇ-વે પર અકસ્માત : કુછડી નજીક આવેલા વોટરપાર્કમાં ફરવા આવેલા દ્વારકા જિલ્લાના યુવાનો પરત જતા હતા ત્યારે બનાવ
પોરબંદર, : પોરબંદર-દ્વારકા હાઇવે પર ભોગાત ગામ પાસે બોલેરો જીપ પલ્ટી જતા એક યુવાનનું મોત થયું હતું. જ્યારે છ યુવાનોને ઇજા થતાં સારવાર માટે પોરબંદરની હોસ્પિટલમાં ખસેડવામાં આવ્યા હતા. દ્વારકા જિલ્લાના યુવાનો કુછડી પાસેના વોટરપાર્કમાં ફરીને પરત જતા હતા ત્યારે અકસ્માતનો બનાવ બન્યો હતો.
પોરબંદર-દ્વારકા હાઇવે પર ભોગાત ગામ પાસે એક બોલેરો પીકઅપ વાન પલ્ટી ખાઇ જતાં અકસ્માત સર્જાયો હતો. આ દુર્ઘટનામાં દ્વારકા જિલ્લાના ભીમરાણા ગામના પાંચ યુવાનો અને મોજબ ગામના એક યુવાનને ગંભીર ઇજાઓ પહોંચતા તાત્કાલિક સારવાર અર્થે પોરબંદરની સરકારી હોસ્પિટલ ખાતે ખસેડવામાં આવ્યા હતા. કમનસીબે, આ અકસ્માતમાં ભીમરાણા ગામના રાજેશ સુમાણીયા નામના યુવાનનું મોત થયું હતું. જ્યારે ભીમરાણાના પરબતભા હમીરભા સુમાણીયા (ઉ.વ. 19), ડુંગરભાઇ સુમાણીયા (ઉ.વ. 30), દેસા ડેરા ચાંદપા (ઉ.વ. 30), અજય મેઘાભા ભગાડ (ઉ.વ. 20), સિધ્ધરાજ પપુભા કેર (ઉ.વ. 22) તથા દ્વારકાના મોજબ ગામના અશ્વિન ડોલુભાઇ માણેક (ઉ.વ. 20)ને ઇજાઓ થતા સારવાર માટે પોરબંદરની સરકારી ભાવસિંહજી હોસ્પિટલ ખાતે ખસેડવામાં આવ્યા હતા.
