વકીલ સાથે કૌટુંબિક મામાના પુત્ર દ્વારા રૂા. 62 લાખની છેતરપિંડી | Lawyer cheated of Rs 62 lakh by family uncle’s son
શેરબજારમાં ઊંચા વળતરની લાલચ આપી શીશામાં ઉતાર્યા : આરોપી મોબાઇલ ફોન બંધ કરી દુબઇ ભાગી ગયો : ઇઓડબલ્યુને તપાસ સોંપાઇ
રાજકોટ, : કુવાડવા રોડ પરનાં શ્રીનાથ પાર્કમાં રહેતાં એડવોકેટ ભવ્ય ગરસોંદીયા (ઉ.વ. 25) સાથે શેરબજારમાં સારા વળતરની લાલચ આપી કૌટુંબીક મામાના પુત્ર પ્રિન્સ લાલજીભાઇ ભુત (રહે. પંચવટી સોસાયટી શેરી નં. 2, મોરબી રોડ)એ રૂા. 62.78 લાખની છેતરપિંડી કર્યાની ક્રાઇમ બ્રાંચમાં ફરિયાદ નોંધાઇ છે. જેની તપાસ ઇઓડબલ્યુને સોંપવામાં આવી છે.
ફરિયાદમાં ભવ્યભાઇએ જણાવ્યું છે કે, છેલ્લા એકાદ વર્ષથી વકીલ તરીકે પ્રેક્ટિસ કરે છે. તે પહેલાં પિતાની પેઢી સંભાળતા હતા. ખોરાણામાં ખેતીની જમીન સાથે પાનનો ગલ્લો પણ છે. જ્યાં પણ અગાઉ બેસતાં હતાં. 2024માં જમ્મુ-કશ્મીર ફરવા ગયાં ત્યારે કૌટુંબિક મામાના પુત્ર પ્રિન્સ સાથે વધુ સંપર્કમાં આવ્યા હતા.
તે વખતે પ્રિન્સે કહ્યું કે, તે શેરબજારનું કામ કરે છે. જેમાં સારૂં વળતર મળે છે. તેને પણ રોકાણ કરવાની વાત કરતાં વિશ્વાસ રાખી તેની નાનામવા સર્કલ પાસે ટ્વિન સ્ટાર બિલ્ડિંગમાં આવેલી શ્રી ઇન્વેસ્ટ નામની ઓફિસે જઇ વાતચીત કર્યા બાદ રૂા.7.75 લાખ ઓનલાઇન આપ્યા હતા. તેના દાદા દિનેશભાઇના બેંક ખાતામાંથી રૂા.80,000 , ભાઇ હિતનાં બેંક ખાતામાંથી રૂા. 15,000 આપ્યા હતા. આ રીતે તેના પરિવારનાં સભ્યોનાં ખાતામાંથી કુલ રૂા. 8.50 લાખ આપ્યા હતા.
ત્યાર પછી કટકે-કટકે રૂા. 56.10 લાખ આપ્યા હતા. કુલ રૂા. 64.60 લાખ આપ્યા હતા. જેમાંથી પ્રિન્સે રૂા.1.82 લાખનું વળતર વિશ્વાસ જીતવા આપ્યું હતું. બદલામાં સિક્યુરીટી પેટે પોતાના બેંક ખાતાનો રૂા.૨૬ લાખનો અને તેના સગા સુધાબેન ભુતનાં નામનો રૂા. 35 લાખનો ચેક આપ્યો હતો. 2025ના મે માસમાં પ્રિન્સ મોબાઇલ ફોન બંધ કરી દુબઇ જતો રહ્યાની માહિતી મળી હતી. તે કૌટુંબિક મામાનો પુત્ર થતો હોવાથી પૈસા આપી દેશે તેમ જણાતાં આજ સુધી ફરિયાદ નોંધાવી ન હતી.
