જામનગરના બે પૂર્વ કોર્પોરેટરની ગેંગ સામે ગુજસીટોક હેઠળ નોંધાયેલા ગુન્હામાં પકડાયેલા 14 આરોપીઓના રિમાન્ડ પુરા થતાં જેલમાં ધકેલાયા | 14 accused arrested under Gujsitok have been sent to jail in jamnagar
Jamnagar : જામનગરના વોર્ડ નંબર 12 ના જ બે પૂર્વ કોર્પોરેટરની ગેંગ સામે અનેક પ્રકારના ગંભીર ગુનાઓ નોંધાયા છે. અને બંને પૂર્વ કોર્પોરેટર વચ્ચે પણ છેલ્લા કેટલાક સમયથી માથાકૂટ ચાલી રહી છે. ત્યારે જામનગર પોલીસે બંનેની ગેંગ સામે ગુજસીટોક હેઠળ ગુનો નોંધ્યો છે, અને અસલમ ગેંગના 13 તથા અલ્તાફ ગેંગના એક આરોપીને મળી કુલ 14 ની ધરપકડ કરી લઈ રિમાન્ડ પર લીધા હતા, જે તમામની રિમાન્ડની મુદત પૂરી થતાં તેઓને જેલ હવાલે કરી દેવાયા છે.
રાજકોટ રેન્જના આઇજી નિર્લિપ્ત રાયની સુચના મુજબ પોલીસ અધિક્ષક ડો.રવિ મોહન સૈનીના માર્ગદર્શન હેઠળ અસલમ કરીમ ખીલજી તથા અલ્તાફ ગફાર ખફી બન્નેની ટોળકી સામે કડક એક્શન લેવામાં આવ્યા હતા, અને સિટી એ. ડિવિઝન પોલીસ મથકમાં ગુજસીટોક અંગેની બે ગુના દાખલ કરવામાં આવ્યા હતા. અસલમ ખીલજી ગેંગના સભ્યો વિરૂધ્ધ કુલ 46 તથા અલ્તાફ ખફી ગેંગના સભ્યો વિરૂધ્ધ કુલ 52 ગુના અલગ અલગ પોલીસ સ્ટેશનમાં નોંધાયા હોય. જેથી બંન્ને ગેંગ વિરૂધ્ધ ગુજરાત આંતકવાદ અને સંગઠીત ગુના નિયંત્રણ અધિનિયમ (ગુજસિટોક) ની કલમ હેઠળ કાર્યવાહી કરાઈ હતી. અસલમ કરીમભાઇ ખીલજી ગેંગના કુલ 18 સભ્યો વિરૂધ્ધ ગુનો દાખલ કરવામાં આવ્યો હતો. જે પૈકી કુલ 13 આરોપીને ઝડપી લેવાયા હતા છે.
જયારે પૂર્વ કોર્પોરેટર અલ્તાફ ગફારભાઇ ખફીની ગેંગના 11 શખ્સો સામે ગુનો નોંધવામાં આવ્યો છે. જે પૈકી કુલ 8 આરોપી હાલ જેલમાં છે. તેમજ 1 આરોપીને ઝડપી લેવાયો હતો. જે તમામ 14 આરોપીઓને રિમાન્ડ પર લેવાયા હતા.
જે તમામની રિમાન્ડની મુદત પૂરી થતાં ફરીથી રાજકોટની સ્પેશિયલ અદાલત સમક્ષ રજૂ કરવામાં આવ્યા હતા, અને તમામને જેલ હવાલે કરવા હુકમ થયો છે. અદાલત દ્વારા તમામને મોરબી, રાજકોટ, અમદાવાદ, વડોદરા, સુરત સહિતની અલગ અલગ જેલમાં મોકલી દેવામાં આવ્યા છે. જામનગરની પોલીસ ટીમ દ્વારા તમામને અલગ અલગ જેલમાં મોકલી આપવા માટેની કાર્યવાહી કરી લેવામાં આવી છે.
