વડોદરામાં બની રહેલી ઇમારત થઇ ધરાશાયી, ત્રણ લોકોનાં મોત, 5 દટાયાની આશંકા
વડોદરાનાં પાણીગેટ વિસ્તારમાં આવેલા બાવામાનપુરામાં સોમવારે મોડી રાતે 4 માળની બની રહેલી બિલ્ડિંગ ધરાશાયી થવાની દૂર્ઘટના સામે આવી છે. જેમાં 9 વ્યક્તિઓ દબાયાનાં સમાચાર મળી રહ્યાં છે. ઘટનાની જાણ થતા ફાયર બ્રિગેડ દ્વારા તરત જ રેસ્ક્યૂ ઓપરેશન હાથ ધરવામાં આવ્યું હતું. આ દૂર્ઘટનામાં રેસ્ક્યૂ કરીને બચાવી લેવાયેલા લોકોમાંથી ગંભીર ઇજા પહોંચતા 3 લોકોનાં મોત નીપજ્યાં છે. આ સાથે આસપાસનાં સ્થાનિકોનાં અનેક વાહનો જેમકે કાર અને બાઇકને પણ નુકસાન થયું છેે.
આ મામલે મળતી પ્રાથમિક માહિતી પ્રમાણે સોમવારે મોડીરાતે આ નિર્માણાધીન બિલ્ડિંગ ધરાશાયી થઇ હતી. બની રહેલી બિલ્ડીંગની નીચે કેટલાક શ્રમજીવીઓ સૂઇ રહ્યાં હતાં.
જેમાં એક બાળક સહિત 9 લોકોનાં દબાયાની આશંકા છે. ફાયરબ્રિગેડ કાટમાળ હટાવીને લોકોને બચાવવાની કામગીરી હાલ ચાલી રહી છે. વહેલી સવારે ધડાકાભેર બિલ્ડીંગ ધરાશાયી થતા આસપાસનાં લોકો પણ મોટા પ્રમાણમાં ભેગા થઇ ગયા હતા.
