વલસાડના સરીગામ GIDCની કલર બનાવતી કંપનીમાં લાગી વિકરાળ આગ, કોઇ જાનહાની નહીં
વલસાડનાં સરીગામ GIDCની કલર બનાવતી સેવન ઇલેવન કંપનીમાં આજે ગુરૂવારે વહેલી સવારે આગ લાગી છે. હાલ 4થી વધુ ફાયર ફાઇટર વિકરાળ આગ પર કાબુ મેળવવાના પ્રયાસ કરી રહ્યાં છે. આ આગ વહેલી સવારે લાગી હોવાથી સદનસીબે કંપનીમાં કોઇપણ માણસ હાજર ન હતુ જેના કારણે હજુ કોઇ જાનહાનીનાં સમાચાર સામે આવ્યા નથી. આ વિકરાળ આગ લાગવાનું ચોક્કસ કારણ હજી સામે આવ્યું નથી.
આ આગની જાણ થતા ફાયર વિભાગની ટીમ અને સ્થાનિક પોલીસની ટીમ ઘટના સ્થળે દોડી આવ્યાં હતા. આ બંન્ને ટીમનો એક જ ધ્યેય હતો કે આ આગ આસપાસ આવેલી કંપનીઓમાં ન ફેલાય. જો આસપાસ ફેલાય તો આગને કાબુ કરવી ઘણી જ મુશ્કેલ બની શકે છે.
કલર બનાવતી કંપનીમાં લાગેલી આગ એટલી વિકરાળ હતી કે, દૂર દૂરથી ધૂમાડાના ગોટેગોટા દેખાઇ રહ્યાં હતા. આ કંપનીમાં સોલવન્ટનાં જથ્થામાં આગ લાગી હતી જેથી પાણીથી આ આગને સરળતાથી બુઝાવી શકાતી નથી. જેથી આ આગને બુઝવવા માટે ફોમનો પણ ઉપયોગ કરવામાં આવી રહ્યો છે.
