આજોડમાં ધાડ પાડનાર મોહનીયા ગેંગનો સાગરીત ૧૦ વર્ષે ઝડપાયો | robber caught after 10 years
વડોદરા, તા.23 વડોદરા નજીક આજોડ ગામે એક મકાનમાં ત્રાટકેલી ધાડપાડુ ટોળકીએ હુમલો કરી ધાડ પાડવાના બનાવમાં સંડોવાયેલા મોહનીયા ગેંગના સાગરીતને જિલ્લા પોલીસે ૧૦ વર્ષ બાદ ઝડપી પાડયો છે.
પ્રાપ્ત માહિતી મુજબ આજોડ ગામમાં વર્ષ-૨૦૧૬માં મારક હથિયારો સાથે ધાડપાડુ ટોળકી ત્રાટકી હતી તેમજ એક જ પરિવારના પાંચ સભ્યો પર હુમલો કરી તેમને ઇજા પહોંચાડી ત્રણ તિજોરી તોડીને અંદરથી સોના-ચાદીના દાગીના, રોકડ અને ત્રણ મોબાઇલ મળી કુલ રૃા.૩૪૫૦૦ની ધાડ પાડી ટોળકી ભાગી ગઇ હતી. આ અંગે તે સમયે તાલુકા પોલીસ સ્ટેશનમાં ગુનો દાખલ થયો હતો.
આ ગુનાની તપાસ દરમિયાન દાહોદ જિલ્લાની મોહનીયા ગેંગની સંડોવણી હોવાનું બહાર આવ્યું હતું જેથી પોલીસે કેટલાક ધાડપાડુઓને ઝડપી પાડયા હતાં જ્યારે રાજુ સુરસીંગ ઉર્ફે રાજુ મોહનીયા (રહે.માતવા, તા.ગરબાડા, જિલ્લો દાહોદ) છેલ્લા ૧૦ વર્ષથી ફરાર હતો. તે ઝડપાતો નહી હોવાથી તેના પર રૃા.૧૦ હજારનું ઇનામ પણ જાહેર કરવામાં આવ્યું હતું. દરમિયાન જિલ્લાના પેરોલ ફર્લો સ્કવોડના સ્ટાફે તેને જેલરોડ પરથી ઝડપી પાડયો હતો. ઉલ્લેખનીય છે કે તેની સામે સાવલી પોલીસમાં પણ ગુનો નોંધાયો હતો.
