અમેરિકા-ઈરાન સંબંધોમાં રાહત: ઈરાને હોર્મુઝ ખોલવાની શરતો સ્વીકારી, બદલામાં ટ્રમ્પે આપી મોટી છૂટ! | US Iran Relations Ease As Trump Grants Oil Relief And Hormuz Reopens
Strait Of Hormuz Reopening : અમેરિકા અને ઈરાન વચ્ચેના તણાવપૂર્ણ સંબંધોમાં નરમાઈના સંકેતો મળ્યા છે. સ્વિટ્ઝર્લૅન્ડમાં બંને દેશો વચ્ચે ચાલી રહેલી શાંતિ મંત્રણાના પ્રથમ તબક્કા બાદ અમેરિકી ટ્રેઝરી વિભાગે ઈરાન પર લાદેલા પ્રતિબંધોમાં 60 દિવસની અસ્થાયી છૂટછાટ આપવાની જાહેરાત કરી છે. બદલામાં ઈરાને પણ અમેરિકાની બે મોટી શરતો સ્વીકારી લીધી છે.
ઈરાને કઈ શરતો માની?: ઈરાન વ્યૂહાત્મક રીતે મહત્ત્વપૂર્ણ એવા સ્ટ્રેટ ઑફ હોર્મુઝ(Strait of Hormuz)માંથી આંતરરાષ્ટ્રીય જહાજોની મુક્ત અને સુરક્ષિત અવરજવર શરૂ કરવા સંમત થયું છે. આ ઉપરાંત, તે આંતરરાષ્ટ્રીય પરમાણુ ઊર્જા એજન્સી(IAEA)ના નિરીક્ષકોને પોતાના દેશમાં પરમાણુ મથકોની તપાસ કરવાની મંજૂરી આપશે.
અમેરિકાએ શું રાહત આપી?: અમેરિકાના ટ્રેઝરી વિભાગે ઈરાન માટે 60 દિવસનું જનરલ લાયસન્સ જાહેર કર્યું છે. આ લાયસન્સ હેઠળ 21 ઑગસ્ટ 2026 સુધી ઈરાન પોતાના કાચા તેલ (Crude Oil) અને પેટ્રોકેમિકલ પ્રોડક્ટ્સની ડિલિવરી અને વેચાણ કરી શકશે. એટલું જ નહીં, આ સમયગાળા દરમિયાન તેલ વેપાર માટે બૅંકિંગ ટ્રાન્ઝેક્શન, ઇન્સ્યોરન્સ અને ટ્રાન્સપોર્ટેશનની સેવાઓ પણ મળી રહેશે.
અમેરિકી ટ્રેઝરી સેક્રેટરી સ્કોટ બેસેન્ટે સોશિયલ મીડિયા પર આ પ્રગતિની પુષ્ટિ કરી છે. જો કે, અમેરિકાએ સ્પષ્ટ કર્યું છે કે, આ છૂટછાટ ઉત્તર કોરિયા કે, ક્યુબા સાથે જોડાયેલા કોઈ વ્યવહારો પર લાગુ પડશે નહીં. બંને દેશો વચ્ચે કાયમી શાંતિ કરાર માટે કુલ 14 મુદ્દાઓ પર વાટાઘાટો ચાલી રહી છે, જેમાંથી આ બે મુખ્ય શરતો પર સહમતી સધાઈ છે.
