વડોદરામાં કાયદો-વ્યવસ્થાના ધજાગરા: પાર્કિંગના મુદ્દે પોલીસ જવાન પર લાકડીઓથી જીવલેણ હુમલો | vadodara police jawan assaulted pratapnagar railway station parking
Vadodara News: વડોદરાના પ્રતાપનગર રેલવે સ્ટેશન નજીક પાર્કિંગના સામાન્ય મુદ્દે એક પોલીસ જવાન પર લાકડીઓ અને ડંડા વડે ઘાતકી હુમલો કરાયો હોવાની ચોંકાવનારી ઘટના સામે આવી છે. મૂળ છોટાઉદેપુર તાલુકાના ગુનાટા ગામના વતની અને હાલ વડોદરાની નવભારત પોલીસ લાઈનમાં રહેતા ધ્રુવેસિંગ દશરથભાઈ રાઠવાએ આ અંગે વાડી પોલીસ સ્ટેશનમાં ફરિયાદ નોંધાવી છે. ધ્રુવેસિંગ છેલ્લા અઢી વર્ષથી લક્ષ્મીપુરા પોલીસ સ્ટેશનમાં ફરજ બજાવે છે અને હાલ પીએસઆઈ (PSI) ની પરીક્ષા હોવાથી 29 જૂન સુધી રજા પર છે. શનિવારે સવારે તેઓ વતન જવા માટે નીકળ્યા ત્યારે આ હિંસક ઘટના બની હતી.
જીવ બચાવવા પ્લેટફોર્મ તરફ ભાગેલા જવાનને દોડાવી દોડાવીને માર્યો
ફરિયાદ અનુસાર, ધ્રુવેસિંગ સવારે પોણા સાત વાગ્યે પ્રતાપનગર રેલવે સ્ટેશન પાસે અલવી વ્હોરા કબ્રસ્તાનની દીવાલ નજીક પોતાની બાઈક પાર્ક કરી રહ્યા હતા. તે દરમિયાન ત્યાં હાજર એક મહિલાએ આવીને પાર્કિંગના પૈસા માંગ્યા હતા. પોલીસ જવાને નિયમ મુજબ પાર્કિંગની પાવતી માંગતા જ મહિલા એકદમ ઉશ્કેરાઈ ગઈ હતી અને ગાળો બોલવા લાગી હતી. જોતજોતામાં મહિલાએ તેના પતિ અને પુત્રને પણ ત્યાં બોલાવી લીધા હતા. આ ત્રણેય જણાએ બાઈક હટાવવાનું કહી ઝઘડો શરૂ કર્યો હતો અને તેમાંથી એક શખ્સે લાકડી વડે ધ્રુવેસિંગ પર હુમલો કરી દીધો હતો. મામાને બચાવવા વચ્ચે પડેલા તેમના ભાણેજને પણ હુમલાખોરોએ બેરહેમીથી માર માર્યો હતો. હુમલાથી બચવા માટે પોલીસ જવાન જ્યારે પ્લેટફોર્મ તરફ ભાગ્યો, ત્યારે ત્રણેય આરોપીઓએ તેનો પીછો કરીને પ્લેટફોર્મ પર પકડી પાડ્યો હતો અને ફરીથી ઢોરમાર મારી જાનથી મારી નાખવાની ધમકી આપી હતી.
પોલીસ પર જ હુમલો થતાં સ્થાનિકોમાં ગભરાટ, વાડી પોલીસે શરૂ કરી તપાસ
જાહેરમાં અને તે પણ રેલવે સ્ટેશન જેવા ગીચ વિસ્તારમાં પોલીસ જવાનને દોડાવી દોડાવીને માર મારવાની આ ઘટનાથી મુસાફરો અને સ્થાનિકોમાં ભારે ગભરાટ ફેલાઈ ગયો હતો. સામાન્ય જનતાની સુરક્ષા કરતી પોલીસ પર જ જ્યારે અસામાજિક તત્વો બેખોફ બનીને હુમલો કરતા હોય, ત્યારે સામાન્ય નાગરિકોની સલામતી સામે મોટા સવાલો ઊભા થાય છે. ભોગ બનનાર પોલીસ જવાનની ફરિયાદના આધારે વાડી પોલીસે ગુનો નોંધી, કાયદો હાથમાં લેનારા આરોપીઓની ધરપકડ કરવા માટેના ચક્રો ગતિમાન કર્યા છે.
