રૂા.50 હજારનો તોડ કરવા ગયેલા બે નકલી પોલીસમેન ઝડપાયા | Two fake policemen caught trying to steal Rs 50 thousand
રૈયાધાર પાસે ગ્રાઉન્ડમાં બેઠેલા ચાર મિત્રો પાસેથી
પોલીસ જેવી હેરકટ કરાવી હતી, એક આરોપીએ પોલીસના લોગોવાળું જેકેટ પણ પહેર્યું હતું
રાજકોટ: રૈયાધારમાં શાંતિનગર ગેઇટથી આગળ સોપાન લક્ઝરીયસ બિલ્ડિંગની પાછળ ક્રિકેટનાં ગ્રાઉન્ડમાં બેઠેલા મિત્રોને પોલીસ તરીકે ઓળખ આપી રૂા.૫૦ હજારનો તોડ કરવા ગયેલા બે આરોપીઓ પરમરાજ દીલિપભાઇ માજરીયા (ઉ.વ.૨૨, રહે. માધાપર પોસ્ટ ઓફિસ પાસે) અને આર્યન ધીરજલાલ ફળદુ (ઉ.વ.૨૧, રહે.ગોકુલધામ શેરી નં.૯)ને ગ્રાંધીગ્રામ-૨ પોલીસે ઝડપી લીધા હતા.
મવડી પ્લોટની મધુરમ સોસાયટી શેરી નં.૨માં રહેતો કિરીટ પીઠડીયા (ઉ.વ.૩૧) વાવડીમાં ઘરઘંટીના બોક્સ બનાવવાના કારખાનામાં મજુરી કરે છે. ગઇ તા.૧૨મીએ સાંજે કારખાનેથી છુટી રાણીમા રૂડીમાં ચોકમાં મિત્રોને મળવા ગયો હતો. ત્યાંથી ત્રણ મિત્રો નરેશ પાંચાલ, રવિ ચાવડા અને ભાર્ગવ જોગર સાથે ગ્રાઉન્ડમાં બેસવા ગયો હતો ત્યારે બેટરીવાળું સ્કૂટર લઇ બંને આરોપીઓ આવ્યા હતા. તેમાંથી એકે પોલીસના લોગોવાળું જેકેટ પહેર્યું હતું. આવીને ‘તમે અહીં ખુલ્લા પટ્ટમાં શું કરો છો’ તેમ કહેતા ડરી ગયેલા કિરીટ અને તેના ત્રણેય મિત્રો ભાગ્યા હતા. તે સાથે જ બંને આરોપીઓએ પીછો કરી કિરીટને ઝડપી લીધો હતો. ત્યારબાદ તેને કહ્યું કે, અમે માલવીયાનગર પોલીસ સ્ટેશનમાંથી આવીયે છીએ, તારા ભાગી ગયેલા મિત્રોને બોલાવ નહીંતર તમારા બંને બાઇક ડીટેઇન કરશું, માલવીયાનગર પોલીસ મથકે લઇ જશું, જો ત્યાં ન આવવું હોય તો રૂા.૫૦ હજાર આપવા પડશે.
કિરીટે ભાગી ગયેલા મિત્રોને બોલાવ્યા હતા, જેમાંથી મિત્ર નરેશને બંને આરોપીઓ ઉપર શંકા જતાં નામ પુછ્યા હતા. બંને આરોપીઓએ પોતાના નામ જણાવ્યા બાદ પોલીસ નહીં હોવાની શંકા જતાં માલવીયાનગર પોલીસની હદ મુકી યુનિવર્સિટી હદ વિસ્તારમાં શું કરો છો તેમ પુછી પોલીસ તરીકેની ઓળખના પુરાવા માંગતા બંને આરોપીઓ ભાંડો ફુટે તે પહેલાં ભાગી ગયા હતા.
બંને આરોપીઓની ઉંમર ૨૬ વર્ષ આસપાસ હતી. વાળ પોલીસ જેવા કપાવેલા હતા. કિરીટે બંને આરોપીઓના નામજોગ ગઇકાલે ગાંધીગ્રામ-૨ પોલીસ મથકમાં ફરિયાદ નોંધાવી હતી. જેના આધારે પોલીસે બંને આરોપીઓને ઝડપી લઇ બીજી કોઇ જગ્યાએ આ રીતે પોલીસ તરીકે ઓળખ આપી તોડપાણી કર્યા છે કે કેમ તે બાબતે તપાસ હાથ ધરી છે.
