ભારતનો વિરોધ છતાં હોર્મુઝમાં ફરી ભારતીય નાવિકોવાળા જહાજ પર ડ્રોન હુમલો | drone attack on indian crew oil tanker bokam marengo in strait of hormuz

Drone Attack On Indian Crew Oil Tanker: હોર્મુઝ સ્ટ્રેટમાં અમેરિકા અને ઈરાન વચ્ચે યુદ્ધ જેવી સ્થિતિ છે. શાંતિ કરારની ચર્ચા થઈ રહી છે, પરંતુ હજુ સુધી કોઈ પુષ્ટિ મળી નથી. આ જહાજોમાં સેવા આપતા ભારતીય નાવિકો આ તણાવનો ભોગ બની રહ્યા છે. હોર્મુઝમાં ભારતીયોને સતત નિશાન બનાવવા મામલે ભારતે વિરોધ કર્યો છે. જોકે, હુમલાઓ બંધ થવાના કોઈ સંકેત દેખાતા નથી. આમ, ભારત વિરોધ છતાં હોર્મુઝમાં ફરી ભારતીય નાવિકોવાળા જહાજ પર ડ્રોન હુમલો થયો છે.

હોંગકોંગના ધ્વજવાળા તેલ અને રાસાયણિક ટેન્કર બોકેમ મારેંગો પર 12-13 જૂનની રાત્રે હોર્મુઝ સ્ટ્રેટમાં ડ્રોન દ્વારા હુમલો કરવામાં આવ્યો હતો. જહાજ પર સંપૂર્ણપણે ભારતીય ખલાસીઓ સવાર હતા. હુમલામાં જહાજને નુકસાન થયું હતું, પરંતુ તમામ ક્રૂ સભ્યો સુરક્ષિત છે.

ભારતીય નાવિકો ફસાયા 

એક તરફ, અમેરિકા એવા જહાજો પર હુમલો કરી રહ્યું છે જે તેનો નાકાબંધી તોડવાનો પ્રયાસ કરે છે. બીજી તરફ, ઈરાન પણ બદલો લઈ રહ્યું છે. ભારતીય નાવિકો વચ્ચે ફસાયેલા છે જેમનો આ સંઘર્ષ સાથે કોઈ સંબંધ નથી.

હોર્મુઝમાં ભારતીય ક્રૂ સાથેના ટેન્કર પર ડ્રોન હુમલો

12-13 જૂન, 2026 ની રાત્રે એક મોટી ઘટના બની હતી. હોર્મુઝમાંથી પસાર થઈ રહેલા એક તેલ ટેન્કર પર ડ્રોન દ્વારા હુમલો કરવામાં આવ્યો હતો. બોર્ડ પરના સમગ્ર ક્રૂમાં ભારતીય ખલાસીઓ હતા. સદનસીબે બધા ખલાસીઓ સુરક્ષિત રીતે બચી ગયા હતા.

આ જહાજનું નામ ‘બોકેમ મારેંગો’ છે. તે એક તેલ અને રાસાયણિક ટેન્કર છે, જેના પર હોંગકોંગનો ધ્વજ લહેરાતો હતો. આ જહાજ એંગ્લો-ઇસ્ટર્ન શિપ મેનેજમેન્ટ (ઇન્ડિયા) પ્રાઇવેટ લિમિટેડ દ્વારા સંચાલિત હતું. તેમાં સવાર બધા નાવિકો ભારતીય હતા.

આ જહાજ યુએસ NCAGS સુરક્ષા પ્રણાલી હેઠળ મેક્સિકોના અખાતમાંથી પસાર થઈ રહ્યું હતું, એટલે કે આ રૂટ પર યુએસ નેવી દ્વારા નજર રાખવામાં આવી રહી હતી. આમ છતાં 12 અને 13 જૂનની રાત્રે એક માનવરહિત ડ્રોને જહાજને નિશાન બનાવ્યું હતું.

જહાજને શું નુકસાન થયું?

આ હુમલાથી જહાજના ત્રણ ભાગોને અસર થઈ. નંબર 1 અને નંબર 2 પોર્ટ વોટર બેલાસ્ટ ટેન્કને નુકસાન થયું. આમ જહાજનું સંતુલન જાળવવા માટે પાણી ભરતા ટેન્કની તેમાં સમાવેશ થાય છે. નંબર 2 પોર્ટ કાર્ગો ટેન્ક, જે તેલ અને રસાયણોનો સંગ્રહ કરે છે તેને પણ અસર થઈ હતી. નુકસાન છતાં જહાજ ડૂબ્યું નહીં અને તેની મુસાફરી ચાલુ રાખવામાં સક્ષમ રહ્યું હતું.

હુમલા પછી શું થયું?

ઘટના પછી તરત જ એક કટોકટી પ્રતિભાવ ટીમને બોલાવવામાં આવી હતી. આ ટીમે પરિસ્થિતિનું નિરીક્ષણ કરવાનું શરૂ કર્યું. જહાજ માલિકોએ સંબંધિત નૌકાદળ એજન્સીઓ અને યુકેએમટીઓને પણ જાણ કરી હતી. જે પ્રદેશમાં જહાજોની સલામતીનું નિરીક્ષણ કરે છે.

જહાજ ક્યાં ગયું?

હુમલા પછી જહાજ ધીમે ધીમે ફુજૈરાહ તરફ આગળ વધતું રહ્યું અને ત્યાં પહોંચ્યું. ફુજૈરાહ એ યુએઈનું એક બંદર છે જે આ પ્રદેશમાં જહાજ સમારકામ માટે જાણીતું છે. શિપિંગ કંપનીએ જહાજનું નિરીક્ષણ અને સમારકામ કરવા માટે ત્યાં એક ખાસ ટીમ મોકલી છે.

ભારતે હોર્મુઝમાં ચાલી રહેલા હુમલાઓ પર સખત વિરોધ નોંધાવ્યો

વિશ્વના તેલ વેપારનો મોટો હિસ્સો હોર્મુઝની સામુદ્રધુનીમાંથી પસાર થાય છે. અમેરિકાએ આ વિસ્તાર પર નાકાબંધી લાદી છે, એટલે કે તેની પરવાનગી વિના કોઈ પણ જહાજ પસાર થઈ શકતું નથી. એમટી સેટેબેલો નામનું જહાજ આ વિસ્તારમાં હતું. આ કોઈ લશ્કરી જહાજ નહોતું. તે દરિયામાં માલ વહન કરતું નિયમિત વેપારી જહાજ હતું. જે પલાઉના ધ્વજ સાથે સફર કરતું હતું, પરંતુ તેમાં સવાર 24 નાવિકો બધા ભારતીય હતા. યુએસ નેવીએ આ જહાજ પર હુમલો કર્યો. જેમાં 21 નાવિકોને બચાવી લેવામાં આવ્યા હતા, પરંતુ ત્રણ માર્યા ગયા હતા.

ભારતે આ હુમલા સામે વાંધો વ્યક્ત કર્યો હતો. શુક્રવારે(13 જૂન) વિદેશ મંત્રી એસ. જયશંકરે યુએસ સેક્રેટરી ઓફ સ્ટેટ માર્કો રુબિયોને ફોન કરીને સ્પષ્ટપણે જણાવ્યું હતું કે, નાગરિક જહાજો પર આવા ઘાતક હુમલાઓ અસ્વીકાર્ય છે. ભારતના વિદેશ મંત્રાલયે દિલ્હીમાં યુએસ કાર્યકારી રાજદૂતને પણ બોલાવીને સખત નારાજગી વ્યક્ત કરી હતી. વિદેશ મંત્રાલયના પ્રવક્તા રણધીર જયસ્વાલે કહ્યું હતું કે, ભારતીય ખલાસીઓને લઈ જતા જહાજો પરના હુમલા તાત્કાલિક બંધ થવા જોઈએ.