જામનગરના સાત રસ્તા સર્કલ વિસ્તારમાં ટ્રાફિક પોલીસની વિશેષ ડ્રાઇવ : ટ્રાફિક નિયમોનો ભંગ કરનાર વાહનચાલકો પાસેથી દંડ વસૂલાયો | Special drive by traffic police in Sat Rasta Circle area of Jamnagar
Jamnagar Traffic Police : જામનગર શહેરમાં ટ્રાફિક નિયમોના અસરકારક અમલ અને માર્ગ સુરક્ષા અંગે જાગૃતિ લાવવાના હેતુથી સાતરસ્તા વિસ્તારમાં વિશેષ ટ્રાફિક ડ્રાઇવનું આયોજન કરવામાં આવ્યું હતું. શહેર વિભાગના ડીવાયએસપીના માર્ગદર્શન અને ઉપસ્થિતિમાં યોજાયેલી આ ડ્રાઇવ દરમિયાન ટ્રાફિક પોલીસની ટીમે સઘન ચેકિંગ હાથ ધર્યું હતું.
ડ્રાઇવ દરમિયાન સાતરસ્તા વિસ્તારમાંથી પસાર થતા અનેક વાહનોની તપાસ કરવામાં આવી હતી. ખાસ કરીને ફોરવ્હીલ વાહનોમાં ગેરકાયદેસર રીતે લગાવવામાં આવેલી ડાર્ક ફિલ્મ સામે ઝુંબેશ ચલાવવામાં આવી હતી. પોલીસે અનેક કારોને અટકાવી તેમની તપાસ કરી હતી, અને નિયમોનો ભંગ કરતી ગાડીઓમાંથી ડાર્ક ફિલ્મ દૂર કરાવી સંબંધિત વાહનચાલકો સામે દંડાત્મક કાર્યવાહી હાથ ધરી હતી.
આ ઉપરાંત સીટ બેલ્ટનો ઉપયોગ ન કરવો, જરૂરી દસ્તાવેજો સાથે ન રાખવા, ટ્રાફિક નિયમોનું ઉલ્લંઘન કરવું સહિતના વિવિધ ભંગ બદલ પણ અનેક વાહનચાલકો સામે કેસો કરવામાં આવ્યા હતા.
પોલીસ તંત્ર દ્વારા જણાવાયું હતું કે માર્ગ સુરક્ષા અને ટ્રાફિક શિસ્ત જળવાઈ રહે તે માટે આવી વિશેષ ડ્રાઇવો આગામી સમયમાં પણ ચાલુ રાખવામાં આવશે. ટ્રાફિક નિયમોનું પાલન કરી સુરક્ષિત વાહન વ્યવહાર માટે પોલીસ દ્વારા વાહનચાલકોને અપીલ પણ કરવામાં આવી હતી.
