અમદાવાદ: મુંબઈ ભાગી ગયેલા જોડિયા ભાઈઓને વટવા પોલીસે 400 CCTV જોઈ 4 દિવસમાં શોધ્યા, પરિવાર સાથે મિલાવ્યા | Ahmedabad Twin Brothers Missing for 4 Days Found After Police Check 400 CCTV Footages
Ahmedabad Twin Brothers Missing: અમદાવાદના વટવામાં ઘરના સભ્યોને કહ્યા વિના રહસ્યમય રીતે ગુમ થયેલા 12 વર્ષીય જોડિયા ભાઈઓને શોધવા માટે વટવા પોલીસે સતત 4 દિવસ સુધી શોધખોળ હાથ ધરી હતી. આ તપાસમાં વિવિધ રેલવે સ્ટેશનોના આશરે 400 જેટલા CCTV ફૂટેજ તપાસીને આખરે બંને બાળકોને વડોદરાથી હેમખેમ શોધી કાઢી પરિવાર સાથે મિલન કરાવ્યું છે.
કોઈને જાણ કર્યા વગર મુંબઈ ઉપડી ગયા હતા ભાઈઓ
મળતી માહિતી અનુસાર, વટવા વિસ્તારની જગન્નાથપુરી સોસાયટીમાં રહેતા 12 વર્ષીય જોડિયા ભાઈઓ પીયૂષ ઠાકુર અને આયુષ ઠાકુર ગત 31મી મેના રોજ બપોરે પરિવારને કશું જ કહ્યા વિના ઘરેથી નીકળી ગયા હતા. બાળકોની કોઈ ભાળ ન મળતા ચિંતાતુર માતા-પિતાએ તાત્કાલિક વટવા પોલીસ સ્ટેશનનો સંપર્ક કર્યો હતો. બાળકોની નાની ઉંમરને ધ્યાનમાં રાખીને વરિષ્ઠ પોલીસ અધિકારીઓની દેખરેખ હેઠળ અલગ-અલગ ટીમો બનાવીને સઘન તપાસ શરૂ કરવામાં આવી હતી.
આ પણ વાંચો: અમદાવાદમાં નકલી ચલણી નોટોના રેકેટનો પર્દાફાશ: ₹28.94 લાખની નકલી નોટો સાથે છ લોકોની ધરપકડ
CCTVના બાળકોની ભાળ મળી
તપાસ દરમિયાન પોલીસ ટીમોએ સ્થાનિક વિસ્તાર અને સર્વેલન્સ કેમેરા ચેક કરવાનું શરૂ કર્યું હતું. આ તપાસમાં એક મહત્ત્વની કડી હાથ લાગી હતી. બંને બાળકો સાયકલ લઈને ઘરેથી નીકળ્યા હતા અને વટવા રેલવે સ્ટેશન પહોંચ્યા હતા. વટવા સ્ટેશનથી તેઓ સાયકલ સાથે જ વડોદરા તરફ જતી ટ્રેનમાં ચઢી ગયા હતા. ત્યારબાદ બંને બાજવા રેલવે સ્ટેશન પર ઉતર્યા હતા અને ત્યાંથી સાયકલ ચલાવીને વડોદરા મુખ્ય સ્ટેશને પહોંચ્યા હતા, જ્યાંથી તેઓ મુંબઈ જતી ટ્રેનમાં બેસી ગયા હતા.
બંને ભાઈઓ મુંબઈ ગયા હોવાની આશંકા પ્રબળ બનતા જ અમદાવાદ પોલીસે તુરંત જ રેલવે ઓથોરિટી સહિત મહારાષ્ટ્રના સ્થાનિક પોલીસ સ્ટેશનો અને સોશિયલ મીડિયા પ્લેટફોર્મ પર બાળકોના ફોટા સાથે ઍલર્ટ જાહેર કર્યું હતું. બાળકોએ અંદાજે બે દિવસ જેટલો સમય મુંબઈમાં વિતાવ્યો હતો અને ત્યારબાદ તેઓ ફરી ગુજરાત પરત ફર્યા હતા.
ચાર દિવસ બાદ બાળકો મળ્યા
પોલીસની ટીમે રૂટ પરના તમામ સ્ટેશનોના અંદાજે 400 જેટલા CCTV કેમેરાની તપાસ કરી હતી. આખરે ચોથા દિવસે બંને ભાઈઓ વડોદરા રેલવે સ્ટેશન પર હોવાનું ટ્રેક થયું હતું. વટવા પોલીસની ટીમ તાત્કાલિક વડોદરા પહોંચી હતી અને બંને બાળકોને સુરક્ષિત કસ્ટડીમાં લઈ અમદાવાદ પરત લાવી હતી. પોલીસ સ્ટેશનમાં બાળકોને જોતા જ માતા-પિતાની આંખોમાં હર્ષના આંસુ આવી ગયા હતા.
