18 બેંક ખાતા વેંચાતા લઈ 17 લોકો સાથે 39.53 લાખનું સાયબર ફ્રોડ | Cyber fraud of Rs 39 53 lakhs with 17 people by selling 18 bank accounts
જૂનાગઢમાં મ્યુલ એકાઉન્ટનું ભૂત ફરી ધુણ્યું : જૂનાગઢના યુવાનની શીલના ગુનામાં ધરપકડ કરાતાં તેની પાસેથી 91 ચેકબુક, ક્રેડિટ કાર્ડ, સીમકાર્ડ મળી આવ્યાં: કુલ 18 સામે ગુનો
જૂનાગઢ, : શીલ પોલીસ સ્ટેશનના ગુનામાં પકડાયેલા શખ્સ પાસેથી અલગ-અલગ લોકોના બેંક એકાઉન્ટ, ચેકબુક, ક્રેડિટ કાર્ડ, સીમકાર્ડ તથા મોબાઈલ મળી કુલ 91 વસ્તુ મળી આવી હતી. એસઓજીએ પૂછપરછ કરતા આ શખ્સે 18 લોકોના બેંક ખાતા વેંચાતા લઈ અન્ય રાજ્યના 17 જેટલા લોકો સાથે સાયબર ફ્રોડ કરી તેમાં જમા થયેલી રકમ વિડ્રો કરી રફેદફે કરી નાખ્યાનું ખૂલ્યું હતું. આ મામલે જૂનાગઢ એસઓજીએ આ યુવાન તેમજ તેને બેંક ખાતા વેંચાતા આપનાર 18 શખ્સો સામે બી ડિવિઝન પોલીસમાં ગુનો દાખલ કરાવ્યો છે.
આ અંગેની વધુ વિગત મુજબ જૂનાગઢના ઝાંઝરડા રોડ પર રહેતા કેવિન રમેશ દેકીવાડીયા સામે શીલ પોલીસ સ્ટેશનમાં સાયબર ફ્રોડ તેમજ આઈટી એક્ટ મુજબ ગુનો દાખલ થયો હતો. સાયબર ક્રાઈમ સેલ દ્વારા આ શખ્સને બાતમીના આધારે અમદાવાદના ગુરૂકુળ રોડ પરથી હસ્તગત કરવામાં આવ્યો હતો. આ શખ્સ પાસેથી મળેલા થેલામાં તપાસ કરતા અલગ-અલગ બેંકની પાસબુક, ચેકબુક, ક્રેડિટ કાર્ડ, સીમકાર્ડ તેમજ પાંચ મોબાઈલ ફોન મળી આવ્યા હતા. આ શખ્સને જૂનાગઢ એસઓજી ખાતે લઈ આવી પૂછપરછ કરતા ખુલ્યું કે કેવિન દેકીવાડીયાએ અલગ-અલગ માણસોને પૈસા આપી બેંક એકાઉન્ટ વેંચાતા લીધા હતા તેમજ આ એકાઉન્ટ પૈસા કમાવવા માટે અન્ય માણસોને ભાડે આપ્યા હતા. એસઓજીએ સાયબર ક્રાઈમ સેલ મારફત એનસીસીઆરપી પોર્ટલ પર તપાસ કરાવતા આ એકાઉન્ટમાં ઝારખંડ, રાજસ્થાન, હરિયાણા, તેલંગાણા, પંજાબ, મહારાષ્ટ્ર, છત્તીસગઢ, આંધ્રપ્રદેશ, દિલ્હી, મેઘાલય, ઉત્તરપ્રદેશ સહિતના રાજ્યના 17 જેટલા લોકો સાથે 39.53 લાખ રૂપીયાનું સાયબર ફ્રોડ કર્યાનું અને આ રકમ કેવિને વેંચાતા લઈ ભાડે આપેલા ખાતાઓમાં જમા થઈ હતી અને તે રકમ વિડ્રો કરી સગેવગે કરી દીધાનું ખૂલ્યું હતું.
