વાપી નજીકના કોચરવા ગામેથી 416 ગ્રામ ગાંજાના જથ્થા સાથે 3 આરોપી પકડાયા | 3 accused arrested with 416 grams of ganja from Kocharwa village near Vapi
Valsad Ganja Smuggling : વલસાડ જિલ્લા સ્પેશિયલ ઓપરેશન ગ્રુપે નાનાપોંઢા તાલુકાના કોચરવા ગામે ખુલ્લી જગ્યામાં છાપો મારી ત્રણ શખ્સોને પકડી પાડી 416 ગ્રામ ગાંજાનો જથ્થો જપ્ત પકડી પાડ્યો હતો. પોલીસે ગાજો, ત્રણ મોબાઇલ, રોકડ સહિતનો મુદ્દામાલ જપ્ત કર્યો હતો.
વલસાડ જિલ્લા સ્પેશિયલ ઓપરેશન ગ્રુપે મળેલી બાતમીના આધારે પી.આઇ. અને ટીમે ગઇકાલે શુક્રવારે વાપી નજીકના અને નાનાપોંઢાના કોચરવા ગામે વડીયાવાડમાં અશોકભાઇની ચાલીની પાછળ ખુલ્લી જગ્યામાં છાપો માર્યો હતો. જે દરમિયાન ત્રણ શખ્સને પકડી પુછપરછ કરી હતી. તપાસ દરમિયાન સફેદ કલરનો પાવડર ભરેલી પ્લાસ્ટિકની કોથળી મળી આવી હતી. પરિક્ષણ કરતા ગાંજો હોવાનું ફલિત થતા 416 ગ્રામ ગાજો, ત્રણ મોબાઇલ, રૂ.5290 સહિતનો મુદ્દામાલ જપ્ત કર્યો હતો.
પોલીસે ત્રણ આરોપી કલીમ ઉર્ફ હકલા અલીમુદ્દીન સૈયદ, (ઉ.વ.32, રહે. ગાયત્રીનગર, ગાલામસાલા, છીરી, વાપી), વિશાલ જીપુ ગંજુ (ઉ.વ.25, રહે. ધીરૂભાઇની ચાલ, વડીયાવાડ, કોચરવા, નાનાપોંઢા) અને આકાશ મુન્ના ગુપ્તા (ઉ.વ.24, રહે. શાંતિનગર, નવીનગરી, ગાલામસાલા, છીરી, વાપી)ની ધરપકડ કરી હતી. નાનાપોંઢા પોલીસે એનડીપીએસ એક્ટ હેઠળ ગુનો નોંધી વધુ તપાસ આદરી છે.
જથ્થો દહાણુંથી લાવતા હતા
ગાંજા કેસમાં પકડાયેલા ત્રણ આરોપીની પુછપરછ કરી હતી. જેમાં આરોપી મહારાષ્ટ્રના દહાણું રહેતી રેખાબેન નામની મહિલા પાસે જથ્થો લાવતા હતા. બાદમાં નાની નાની પડીકી બનાવી રૂ.100થી 150માં છુટકમાં વેચાણ કરતા હતા. પોલીસે જથ્થો આપનાર રેખાબેનને પકડવા કવાયત આદરી છે.
ત્રણેય આરોપી ગુનાહિત ઇતિહાસ ધરાવે છે
વલસાડ એસઓજીએ ગાંજાના જથ્થા સાથે ત્રણ આરોપીને પકડી પાડી ગાંજાના નેટવર્કનો પર્દાફાશ કર્યો છે. પકડાયેલા ત્રણેય આરોપી ગુનાહિત ઇતિહાસ ધરાવે છે. જેમાં કલીમ ઉર્ફે હકલા સામે વાપી ટાઉન, જીઆઇડીસી અને ડુંગરામાં કુલ 14 ગુના, વિશાલ સામે વાપી ટાઉન અને જીઆઇડીસીમાં 2 ગુના અને આકાશ સામે ડુંગરા અને વાપી જીઆઇડીસીમાં અગાઉ 2 ગુના નોંધાયા હતા. ત્રણેય આરોપી મજૂરી કામની સાથે ગુનાહિત પ્રવૃત્તિમાં જોડાયેલા હતા.
