પ્રિ-મોન્સૂનની કામગીરી છતાં ગણેશનગર રૂપારેલ કાંસમાં કચરાના ઢગલા | Despite pre monsoon work piles of garbage remain in Ganeshanagar Ruparel Kans
Vadodara : વડોદરા શહેરના પૂર્વ વિસ્તારમાં આજવા રોડથી વાઘોડિયા રોડ તરફ પસાર થતી રૂપારેલકાંસ-ગાજરાવાડી વિસ્તારમાં ગણેશનગર કાંસથી જાણીતી છે. વર્ષો જૂની આ કાંસની સફાઈ મહદ અંશે પૂરી થઈ હોવા છતાં પણ કચરો ભરાઈ રહેવાના કારણે નાળામાંથી ગંદુ પાણી પસાર નહીં થતાં વિવાદ સર્જાયો હતો.
રૂપારેલ વરસાદી કાસ વડોદરા કોર્પોરેશન માટે માથાનો દુખાવો બની ગયો છે. પ્રિમોન્સૂનની કામગીરી કરવા છતાં તેમાં અનેક જગ્યાએ ગંદકી રહી ગઈ હતી. જેને કારણે રૂપારેલ કાંસમાં ઠલવાતું ડ્રેનેજના ગંદા પાણીનો નિકાલ થતો નથી. પ્રિમોન્સૂન અંગેની કામગીરીમાં આ કાંસની સફાઈ શરૂ કરવામાં આવી છે જે આગામી વર્ષાઋતુ અગાઉ પૂરી થવાની શક્યતા સેવાઈ રહી છે.
શહેરના પૂર્વ વિસ્તારમાં આવેલા વોર્ડ નંબર16 માં આજવા રોડથી વાઘોડિયા રોડ તરફ જતી વર્ષો જૂની રૂપારેલ કાંસ આવેલી છે. આ કાંસમાં અગાઉ કેટલીક કામગીરી કરવામાં આવી હતી. પરંતુ કોઈક કારણોસર આ કામગીરી અધુરી મૂકી દેવાઇ હતી. ગાજરાવાડી વિસ્તારની ગણેશનગર સોસાયટી પાસેથી પસાર થતી આ કાંસ ગણેશનગરની કાંસના નામે જાણીતી છે. અગાઉ કોઈપણ કારણસર અધૂરી રહેલી કામગીરીના કારણે જો ગમે ત્યારે વરસાદ પડે તો નાળામાં ભરાયેલ કચરાના કારણે આ વિસ્તારમાં પૂર જેવી પરિસ્થિતિ સર્જાઈ શકે છે. જ્યારે બીજી બાજુ પ્રિમોન્સૂન કામગીરી દરમિયાન ગણેશનગર નાળા આસપાસથી ગંદકી અને કચરો દૂર કરવાની કાર્યવાહી શરૂ કરવામાં આવી છે. જે ધીમી ગતિએ ચાલતી હોવાથી ચોમાસા પહેલા કામગીરી પૂર્ણ થશે કે કેમ તે અંગે સ્થાનિક રહીશોએ શંકા વ્યક્ત કરી હતી.
