જામનગરના એક ગામમાં મોડી રાત્રે ફિલ્મોની જેમ ગાડીઓ દોડી, પોલીસે ચેક કર્યું તો ચોંકી ઉઠી | jamnagar police chase liquor car bootlegger escapes khimrana
Jamnagar News: જામનગર તાલુકાના ખીમરાણા ગામમાં મોડી રાત્રે રીતસરના ફિલ્મી દૃશ્યો સર્જાયા હતા. દારૂ ભરેલી એક ઇનોવા કાર બેફામ ગતિએ ગામની ગલીઓમાં ઘૂસી આવતાં સ્થાનિકોમાં ભારે ફફડાટ અને હડકંપ મચી ગયો હતો. પોલીસના પીછાથી ગભરાયેલા બુટલેગરે સ્ટેયરિંગ પરથી કાબૂ ગુમાવતા કાર સીધી સરકારી શાળાની પાછળ આવેલી એક દીવાલ સાથે ધડાકાભેર અથડાઈ હતી. અકસ્માત બાદ પોલીસ પકડથી બચવા બુટલેગર કાર ઘટનાસ્થળે જ મૂકી અંધારામાં ઓગળી ગયો હતો. આ સમગ્ર ઘટનાના લાઇવ વીડિયો સોશિયલ મીડિયામાં જોરદાર વાયરલ થઈ રહ્યા છે.
અડધી રાત્રે પોલીસનો હાઇ-વોલ્ટેજ પીછો
પંચકોશી એ. ડિવિઝન પોલીસ મથકનો સ્ટાફ જ્યારે પ્રોહિબિશન પેટ્રોલિંગમાં હતો, ત્યારે તેમને પાકી ખાનગી બાતમી મળી હતી કે, એક ટોયોટા ઇનોવા કાર(નંબર: GJ-10-BG-3234)માં વિદેશી દારૂનો મોટો જથ્થો છુપાવીને ફલ્લા તરફથી ખીજડિયા બાયપાસ તરફ લઈ જવાઈ રહ્યો છે. બાતમીવાળા રૂટ પર પોલીસે વોચ ગોઠવીને ઇનોવા કારને રોકવાનો પ્રયાસ કર્યો, પરંતુ બુટલેગરે કાર ઊભી રાખવાના બદલે ફૂલ સ્પીડમાં ભગાડી મૂકી હતી. પોલીસે પણ સમય બગાડ્યા વિના આ શંકાસ્પદ કારનો ફિલ્મી ઢબે પીછો શરૂ કર્યો હતો.
આ પણ વાંચો : વલસાડમાં ઘરકંકાસ બાદ માતાએ 3 માસૂમને મોતને ઘાટ ઉતાર્યા બાદ ઝેર ગટગટાવ્યાંની આશંકા
ગામની ગલીઓમાં રેસ અને શાળાની દીવાલ સાથે અકસ્માત
પોલીસ સતત પાછળ હોવાથી બુટલેગરે કારને બચાવવા માટે ખીમરાણા ગામની સાંકડી ગલીઓમાં નાખી દીધી હતી. જોકે, પૂરઝડપે દોડતી આ લક્ઝુરિયસ કાર સરકારી શાળાની પાછળના રસ્તા પાસે એક દીવાલ સાથે જોરદાર રીતે ભટકાઈ પડી હતી. કાર અટકી જતાં જ અંદર બેઠેલો શખ્સ તક જોઈને ત્યાંથી ભાગી છૂટવામાં સફળ રહ્યો હતો. શાંત ગામની અંદર આ પ્રકારે દારૂની હેરાફેરી અને બેફામ સ્પીડે કાર દોડાવવાની ઘટનાને પગલે સ્થાનિક લોકો મોટી સંખ્યામાં એકત્ર થઈ ગયા હતા. બુટલેગરોની આવી જોખમી કરતૂત સામે લોકોએ ભારે રોષ વ્યક્ત કર્યો હતો અને સ્થળ પર જ વીડિયો શૂટ કરીને સોશિયલ મીડિયામાં વહેતા કર્યા હતા.
કારમાંથી મળ્યો 7 લાખ રૂપિયાનો દારૂ
અકસ્માતગ્રસ્ત ઇનોવા કારની પોલીસે તલાશી લેતાં તેમાંથી ભારતીય બનાવટના વિદેશી દારૂની નાની બોટલોનો મોટો જથ્થો મળી આવ્યો હતો. પોલીસે કાયદેસરની કાર્યવાહી કરીને મુદ્દામાલ જપ્ત કર્યો છે. જેમાં ઇંગ્લિશ દારૂ (નાની બોટલ): કૂલ 4704 નંગ (કિંમત 7,05,600 રૂપિયા) ટોયોટા ઇનોવા કાર: 1 નંગ (કિંમત 4,00,000 રૂપિયા) કુલ જપ્ત મુદ્દામાલ: 11,05,600 રૂપિયા
