અમદાવાદમાં હનીટ્રેપ! વોટ્સએપ પર ફ્રેન્ડશિપ બાદ યુવતીએ મળવા બોલાવ્યો, પતિએ મિત્ર સાથે મળી યુવકને ચપ્પુના ઘા ઝીંક્યા | Ahmedabad Crime: Youth Attacked with Knife After Meeting Woman Met on WhatsApp
Ahmedabad Crime: સરહદ સર કરી રહેલા ડિજિટલ પરિચય ક્યારેક કેટલા જોખમી સાબિત થઈ શકે છે તેનો જીવતો-જાગતો કિસ્સો અમદાવાદના માધુપુરા વિસ્તારમાં જોવા મળ્યો છે. ચાંગોદરથી એક પરિણીત યુવતીને મળવા આવેલા યુવક પર તેના જ પતિ અને મિત્રે ઘાતકી હુમલો કરી તેને મોતના ઘાટ ઉતારવાનો પ્રયત્ન કર્યો હતો. ઈજાગ્રસ્ત યુવકે આ મામલે માધવપુરા પોલીસ સ્ટેશનમાં બંને નરાધમો વિરૂદ્ધ નામજોગ ફરિયાદ નોંધાવી છે.
વોટ્સએપ પર થઈ હતી મિત્રતા
મળતી માહિતી મુજબ, ચાંગોદર વિસ્તારમાં રહીને ખેતીકામ કરતા એક યુવકને આશરે 15 દિવસ પહેલાં અજાણ્યા નંબર પરથી એક યુવતીનો મેસેજ આવ્યો હતો. ત્યાર બાદ બંને વચ્ચે વોટ્સએપ પર નિયમિત વાતચીત અને મેસેજનો સિલસિલો શરૂ થયો હતો. આ પરિચય વધતાં ચાર દિવસ પહેલાં યુવક તે યુવતીને મળવા માટે આશ્રમ રોડ પર આવ્યો હતો. જોકે, મુલાકાત દરમિયાન જ યુવતીનો પતિ તેના મિત્ર સાથે ત્યાં આવી પહોંચ્યો હતો અને યુવકને ઢોર માર માર્યો હતો. તે સમયે યુવક જેમ-તેમ કરીને ત્યાંથી બચીને ભાગી છૂટ્યો હતો.
અગાઉની બબાલ છતાં ફરી મળવા બોલાવ્યો અને ખેલાયો લોહિયાળ ખેલ
આશ્ચર્યની વાત એ છે કે, અગાઉ માર પડ્યો હોવા છતાં ગત 25મી મેના રોજ યુવતીએ ફરીથી મેસેજ કરીને યુવકને દૂધેશ્વર રોડ પર મળવા માટે આગ્રહ કર્યો હતો. પરિચયના મોહમાં યુવક પોતાનું ટુ-વ્હીલર લઈને ત્યાં પહોંચી ગયો હતો. પરંતુ, ઘટનાસ્થળે યુવતીના બદલે તેનો પતિ અને તેનો મિત્ર અગાઉથી જ પ્લાનિંગ કરીને ટાંપીને બેઠા હતા.
બંને શખ્સો યુવકને પરાણે નજીકના એક અવાવરું પાર્કિંગમાં ખેંચી ગયા હતા અને અંધારાનો લાભ ઉઠાવી તેના પર ચપ્પુ વડે ઉપરાછાપરી હુમલો કરી દીધો હતો. ચપ્પુના ઘા વાગવા છતાં યુવક હિંમત હાર્યા વગર બંનેની પકડમાંથી છૂટીને લોહીલુહાણ હાલતમાં મુખ્ય રોડ તરફ દોડ્યો હતો. રસ્તા પર યુવકની ગંભીર હાલત જોઈને સ્થાનિક લોકો એકઠા થઈ ગયા હતા અને તેને તાત્કાલિક સારવાર માટે નજીકની હોસ્પિટલ ખસેડ્યો હતો. હાલ પોલીસે ગુનો નોંધી ફરાર આરોપીઓની શોધખોળ આદરી છે.
