ઇન્સ્ટાગ્રામ પર ખાખીનો વટ અને અસલી જિંદગીમાં જેલ! સુરેન્દ્રનગરમાં નકલી Dy.S.P. સોહિલખાન પઠાણ ઝડપાયો | Fake DySP Arrested in Surendranagar for Fraud Through Social Media
Fake DySP Arrested in Surendranagar: સોશિયલ મીડિયાના માધ્યમથી સરકારી અધિકારી તરીકેની ખોટી ઓળખ ઉભી કરી લોકો સાથે ઠગાઈ અને આર્થિક લાભ મેળવતા તત્ત્વો સામે પોલીસે લાલ આંખ કરી છે. રાજકોટ રેન્જ આઈજીના સીધા માર્ગદર્શન હેઠળ રાજકોટ રેન્જ ટેકનિકલ ટીમે એક એવા જ શાતિર ભેજાબાજ આરોપીને ઝડપી પાડ્યો છે, જે પોતે રાજ્ય સ્તરનો ડેપ્યુટી સુપરિટેન્ડન્ટ ઓફ પોલીસ (Dy.S.P.) હોવાની ખોટી ઓળખ આપી લોકોને ભોળવતો હતો.
સોશિયલ મીડિયા પર રોફ જમાવી આર્થિક લાભ મેળવતો હતો
મળતી માહિતી અનુસાર, પકડાયેલ આરોપી સોશિયલ મીડિયા પ્લેટફોર્મ પર પોલીસ યુનિફોર્મ અને ખોટી ઓળખ આપતા ફોટાઓ શેર કરતો હતો. તે પોતાની ઓળખ રાજ્ય સ્તરના ઉચ્ચ પોલીસ અધિકારી તરીકે આપીને લોકો પર રોફ જમાવતો હતો અને તેનો દુરુપયોગ કરી કાયદાની આડમાં ગેરકાયદે રીતે આર્થિક લાભ મેળવતો હતો.
રાજકોટ રેન્જ ટેકનિકલ ટીમને મળેલી ચોક્કસ બાતમી અને ડિજિટલ સર્વેલન્સના આધારે સુરેન્દ્રનગર જિલ્લાના સાયલા તાલુકામાં આવેલા નવાગઢ વિસ્તારમાં દરોડો પાડવામાં આવ્યો હતો. આ ઓપરેશન દરમિયાન પોલીસે નકલી Dy.S.P. બનેલા સોહિલખાન પઠાણ નામના આરોપીને રંગેહાથ ઝડપી લીધો હતો. પોલીસે આરોપી સોહિલખાન પાસેથી ખોટી ઓળખ ઉભી કરવા માટે ઉપયોગમાં લેવાતા નકલી દસ્તાવેજો અને અન્ય આધારો કબ્જે કર્યા છે. આ પુરાવાઓના આધારે પોલીસે તેની કરતૂતોનો પર્દાફાશ કર્યો છે.
આ પણ વાંચો: છોટા ઉદેપુર તાલુકા પંચાયત ચૂંટણીમાં ભારે હોબાળો: ‘આપ’ના 3 સભ્યોનું અપહરણ થયાના આક્ષેપ
કાયદેસરની કાર્યવાહી અને તપાસનો ધમધમાટ
આ સફળ કામગીરી બાદ આરોપી સોહિલખાન પઠાણ સામે સાયલા પોલીસ સ્ટેશનમાં આઈ.પી.સી./ભારતીય ન્યાય સંહિતાની સંબંધિત કલમો હેઠળ ગુનો દાખલ કરવામાં આવ્યો છે. આ નકલી અધિકારીએ અત્યાર સુધીમાં Dy.S.P.ની ઓળખ આપીને કેટલા લોકોને શિકાર બનાવ્યા છે અને કેટલો આર્થિક લાભ મેળવ્યો છે, તે દિશામાં પોલીસે રિમાન્ડ મેળવીને વધુ તપાસના ચક્રો ગતિમાન કર્યા છે.
