દ્વારકાના ઓખા મઢીમાંથી 1 કરોડના ચરસના જથ્થા સાથે શખ્સ ઝડપાયો | Man arrested with charas worth Rs 1 crore from Okha Mardi in Dwarka
અતિ સંવેદનશીલ કોસ્ટલ બેલ્ટમાં ડ્રગ્સ માફિયા બેફામ : 2 કિલો 53 ગ્રામ ચરસનો જથ્થો કબજે કરી પૂછપરછઃ 15 દિવસમાં ત્રીજી વખત ચરસનો જથ્થો ઝડપાયો
દ્વારકા, ખંભાળિયા, : દેવભૂમિ દ્વારકા જિલ્લો અને તેનો અતિ સંવેદનશીલ ગણાતો દરિયાઈ પંથક હાલ ડ્રગ્સ માફિયાઓ માટે સોફ્ટ ટાર્ગેટ બની રહ્યો હોય તેમ લાગી રહ્યું છે. દ્વારકા વિસ્તારમાં સ્થાનિક પોલીસે આજરોજ કરેલી કાર્યવાહીમાં ઓખા મઢી વિસ્તારમાં રહેતા એક શખ્સને રૂપિયા 1.02 કરોડની કિંમતના ૨ કિલોગ્રામથી વધુ ચરસ સાથે ઝડપી લીધો હતો.
આ સમગ્ર પ્રકરણની સૂત્રો દ્વારા જાહેર કરવામાં આવેલી વિગત મુજબ દ્વારકા પોલીસને મળેલી બાતમીના આધારે દ્વારકા તાલુકાના ઓખા મઢી વિસ્તારમાં રહેતા ભાવેશ ઉર્ફે ભાવલો કનુભાઈ ચાસીયા નામના શખ્સને રૂા. 1,02,65,000 ની કિંમતના 2 કિલો 53 ગ્રામ ચરસના જથ્થા સાથે ઝડપી લેવામાં આવ્યો હતો.
આ પ્રકરણમાં પોલીસે મોટરસાયકલ, મોબાઈલ ફોન અને 1.02 કરોડના ચરસના જથ્થા સહિત કુલ રૂપિયા 1,03,40,000 નો મુદ્દામાલ કબજે કરી, એન.ડી.પી.એસ. એક્ટ હેઠળ આગળની કાર્યવાહી કરી હતી. તથા આ શખ્સે ચરસનો જથ્થો ક્યાંથી મેળવ્યો તે અંગે તપાસ હાથ ધરી છે.
અતિ સંવેદનશીલ ગણાતા આ કોસ્ટલ બેલ્ટમાં ડ્રગ્સ માફિયાઓ બેફામ બનતા સ્થાનિક લોકો અને સુરક્ષા નિષ્ણાંતોમાં ભારે ચર્ચાનો વિષય બન્યો છે. 15 દિવસમાં ત્રીજી વખત ચરસનો જથ્થો ઝડપાયો છે. પોલીસ તથા સુરક્ષા એજન્સીઓ દ્વારા માદક પદાર્થના મસમોટા નેટવર્કના મૂળ સુધી પહોંચવા તપાસનો ચક્રો ગતિમાન કર્યા છે.
