સાવધાન! સાબરમતી સ્ટેશન પર મુસાફરો પાસેથી નાણાં પડાવતો નકલી TTE ઝડપાયો, અસલી ઓળખ છતી થઈ | Ahmedabad Railway Police caught a fake TTE at Sabarmati Railway Station
Ahmedabad Railway Police: અમદાવાદ શહેરના સાબરમતી રેલવે સ્ટેશન પર પોલીસે ટીટીઇ (ટ્રાવેલીંગ ટિકીટ એક્ઝામીનર) બનીને પેસેન્જર પાસેથી નાણાં પડાવતા મુંબઇના એક યુવકને ઝડપીને ગુનો નોંધ્યો છે. પ્રાથમિક તપાસમાં તે છેલ્લાં ઘણા મહિનાઓથી બોગસ ટીટીઇ બનીને અમદાવાદ સહિત અન્ય રેલવે સ્ટેશનો પર જઇને પેસેન્જરોને ટાર્ગેટ કરતો હતો.
સાબરમતી રેલવે સ્ટેશનના પ્લેટફોર્મ નંબર એકની સામે ગુરૂવારે સવારે આવી રહેલી ટ્રેનના પેસેન્જરને રોકીને એક યુવક ટિકિટ તપાસી રહ્યો હતો. જો કે તેની આરપીએફના સ્ટાફને તેની હરકત શંકાસ્પદ જણાતા અન્ય સ્ટાફને પુછીને તપાસ કરી હતી.
ત્યારબાદ તેની પાસે જઇને આઈકાર્ડ માંગતા તે યુવકે નાસવાનો પ્રયાસ કર્યો હતો. પોલીસે તેને ઝડપીને પુછપરછ કરતા તેનું નામ મુકેશ માળી (રહે. સંજયનગર, ગોરેગાંવ (પૂર્વ), મુંબઇ) હોવાનું જાણવા મળ્યું હતું. તે મુંબઇમાં કપડાનો વ્યવસાય કરતો હતો. પરંતુ, થોડા મહિના પહેલા તેને રેલવે સ્ટેશન પર જઇને બનાવટી ટીટીઇ બનીને નાણાં કમાવવાનો વિચાર આવ્યો હતો. જેમાં પ્રથમ પ્રયાસમાં તે સફળ થયો અને ત્યારબાદ તે અમદાવાદ સહિતના વિવિધ રેલવે સ્ટેશન પર જઇને બનાવટી ટીટીઇ બનીને નાણાં પડાવતો હતો. આ અંગે સાબરમતી રેલવે પોલીસે ગુનો નોંધી વધુ તપાસ શરૂ કરી છે.
