બીસીએ કોર્સમાં 240 બેઠકો પર પ્રવેશ અપાશે,બે નવી કોમ્પ્યુટર લેબોરેટરી બનાવાશે | science faculty of msu will give admission on 240 seats in bca course of msu
વડોદરાઃ એમ.એસ.યુનિવર્સિટીની સાયન્સ ફેકલ્ટીના સત્તાધીશોએ વિદ્યાર્થીઓના વિરોધ બાદ બીસીએ (બેચલર ઓફ કોમ્પ્યુટર એપ્લિકેશન) કોર્સમાં ૨૪૦ બેઠકો યથાવત રાખવાનો નિર્ણય લીધો છે.
સત્તાધીશોએ આ પહેલા નવા શૈક્ષણિક વર્ષથી બેઠકો ઘટાડીને ૧૨૦ કરવાનો નિર્ણય લીધો હતો.જોકે તેની સામે વિદ્યાર્થીઓમાં વ્યાપક અસંતોષ જોવા મળ્યો હતો.એ પછી સત્તાધીશોએ આ વખતે પણ ૨૪૦ બેઠકો માટે જ પ્રવેશ પરીક્ષા લેવાનું નક્કી કર્યું છે.
જોકે તેની સામે માળખાકીય સુવિધાઓમાં વધારો કરવામાં આવશે.ફેકલ્ટી ડીન પ્રો.કલમકરે કહ્યું હતું કે, અત્યારે અમારી પાસે ચાર કોમ્પ્યુટર લેબોરેટરી છે પણ હવે બીસીએ કોર્સ ત્રણની જગ્યાએ ચાર વર્ષનો થઈ ગયો છે.ઉપરાંત ૨૪૦ વિદ્યાર્થીઓ માટે ચાર લેબોરેટરી પૂરતી નથી એટલે આગામી બે મહિનામાં ૮૦-૮૦ કોમ્પ્યુટરો સાથેની બે નવી લેબોરેટરી બનાવવામાં આવશે.
તેમણે કહ્યું હતું કે, આ લેબોરેટરી પાછળ લગભગ એક કરોડ રુપિયાના ખર્ચનો અંદાજ છે. યુનિવર્સિટી સત્તાધીશોને લેબોરેટરી માટે કોમ્પ્યુટર ખરીદી સહિતની બીજી મંજૂરી વહેલી તકે આપવા માટે અમે વિનંતી કરી છે.આ વખતે પણ અત્યાર સુધીમાં ૭૦૦ જેટલા ફોર્મ ભરાઈ ચૂકયા છે.ફોર્મ ભરવા માટે હજી એક સપ્તાહનો સમય છે ત્યારે ૨૪૦ બેઠકો ભરવામાં પણ કોઈ મુશ્કેલી પડે તેમ નથી.
