અક્ષય બુડાનિયા વડોદરા કોર્પોરેશનના ડેપ્યુટી કમિશનર : ગંગાસિંહને નર્મદાના કલેક્ટર તરીકેની જવાબદારી | Akshay Budania Deputy Commissioner of Vadodara Corporation
Vadodara Corporation : રાજ્યના વહીવટી તંત્રને વેગવંતુ બનાવવા અને સનદી અધિકારીઓના માળખામાં નવો પ્રાણ ફૂંકવા માટે રાજ્ય સરકારે મધરાતે સામાન્ય વહીવટ વિભાગ દ્વારા એકસાથે 72 આઈએએસ અધિકારીઓની બદલીના આદેશો જારી કર્યા છે. જિલ્લા કલેક્ટરથી લઈને મ્યુનિસિપલ કમિશનર સુધીના પદો પર કરવામાં આવેલા ફેરફારોમાં ક્યાંક અનુભવને પ્રાધાન્ય મળ્યું છે તો ક્યાંક યુવા જોશને મહત્વની જવાબદારી સોંપાઈ છે.
વડોદરા મ્યુનિસિપલ કોર્પોરેશનમાં વહીવટી શિસ્ત અને વિકાસકામોને વેગ આપવા માટે સરકારે બોટાદના જિલ્લા વિકાસ અધિકારી અક્ષય બુડાનિયા પર વિશ્વાસ મૂક્યો છે. તેમને વડોદરાના નવા ડેપ્યુટી મ્યુનિસિપલ કમિશનર તરીકે નિયુક્ત કરવામાં આવ્યા છે. અક્ષય બુડાનિયાની છબી એક કડક અને કાર્યદક્ષ અધિકારી તરીકેની રહી છે, જેનો લાભ હવે વડોદરાના નગરજનોને મળશે.
(ડાબેથી નર્મદા જિલ્લાના કલેક્ટર ગંગાસિંહ, વડોદરાના ડેપ્યુટી મ્યુનિ કમિશનર અક્ષય બુડાનિયા, વડોદરાના ડીડીઓ IAS મમતા હિરપરા)
વડોદરામાં મહત્વની ભૂમિકા ભજવ્યા બાદ ગંગાસિંહને હવે નર્મદા જિલ્લાના કલેક્ટર તરીકેની જવાબદારી સોંપાઈ છે. નર્મદા જિલ્લોએ વિશ્વની સૌથી ઊંચી પ્રતિમા ‘સ્ટેચ્યુ ઓફ યુનિટી’ ધરાવતો જિલ્લો હોવાથી ત્યાં પર્યટન અને સ્થાનિક આદિવાસી સમાજના વિકાસ વચ્ચે સંતુલન જાળવવુંએ ગંગાસિંહ માટે મોટો પડકાર અને તક બંને બની રહેશે.
વડોદરાના ડીડીઓ તરીકે સફળ કામગીરી કરનાર મમતા હિરપરાની અમદાવાદ મ્યુનિસિપલ કોર્પોરેશનમાં બદલી કરવામાં આવી છે. રાજ્યની સૌથી મોટી કોર્પોરેશનમાં તેમને મહત્વની જવાબદારી સોંપીને સરકાર તેમના મેનેજમેન્ટ કૌશલ્યનો ઉપયોગ કરવા માંગે છે.
