અમદાવાદના મેમ્કોમાં લુબી કંપનીના 500 કર્મચારીઓની હડતાળ, વેતન વધારા અને ઓવરટાઈમ મુદ્દે કામદારોનો આક્રોશ | Many Workers Protest at Memco Plant Over Salary Hikes and Overtime in Ahmedabad
Ahmedabad News: અમદાવાદના મેમ્કો વિસ્તારમાં કાર્યરત લુબી કંપનીના કારખાનામાં આજે(6 મે) અચાનક જ કામકાજ ખોરવાઈ ગયું છે. કંપનીમાં ફરજ બજાવતા 500 કરતાં વધુ કામદારોએ પોતાની વિવિધ પડતર માંગણીઓને લઈને એકાએક હડતાળ શરૂ કરી છે. આ વિરોધ પ્રદર્શનના પગલે કંપનીનું ઉત્પાદન કાર્ય સંપૂર્ણપણે ઠપ્પ થઈ ગયું છે અને તમામ દેખાવકારો કારખાનાના પરિસરમાં જ એકઠા થઈને વિરોધ નોંધાવી રહ્યા છે.
વેતન વધારવાની માગ સાથે 500થી વધુ કર્મચારીઓની હડતાળ
કર્મચારીઓના આ આક્રોશ પાછળનું મુખ્ય કારણ પગાર વધારો અને ઓવરટાઇમના વણઉકેલ્યા પ્રશ્નો છે. કામદારોનો આક્ષેપ છે કે, તેઓએ અગાઉ પણ મેનેજમેન્ટ સમક્ષ વેતન વધારવા અંગે અનેકવાર રજૂઆતો કરી હતી, પરંતુ સત્તાધીશો દ્વારા તે દિશામાં કોઈ જ સંતોષકારક પગલાં લેવામાં આવ્યા ન હતા. હવે આ તમામ કર્મચારીઓ સરકારના નિર્ધારિત નિયમો અને ધારા-ધોરણોને ટાંકીને તેમના પગારમાં 18,000 રૂપિયા સુધીનો વધારો કરવામાં આવે તેવી માગ કરી રહ્યા છે.
હડતાળના કારણે પરિસ્થિતિ તંગ
હાલમાં હડતાળના કારણે પરિસ્થિતિ તંગ બની છે અને ફેક્ટરીના મુખ્ય દરવાજા બંધ કરી દેવામાં આવ્યા છે. અહેવાલો મુજબ, અંદર વિરોધ કરી રહેલા એક પણ કર્મચારીને કંપનીની બહાર આવવા દેવામાં આવી રહ્યા નથી. સરકારી નિયમો મુજબ યોગ્ય વળતર અને ઓવરટાઇમના હકો ન મળવાને કારણે શ્રમિકોમાં ભારે રોષ ભભૂકી ઉઠ્યો છે, જેના કારણે લુબી કંપનીના સંચાલકો માટે આ સ્થિતિ પડકારજનક બની ગઈ છે.
કર્મચારીઓની વિવિધ માગ
– લઘુત્તમ વેતન 21,000થી 25,000 કરવામાં આવે.
– મહત્તમ વેતન મુજબ જે પગાર થશે તેના વાર્ષિક એગ્રીમેન્ટ વધારા પેટે 1500થી 2000 વધારે આપવું.
– મહત્તમ પગાર વધ્યા પછી, જે પ્રમાણે અગાઉનું પ્રોડક્શન હશે તે જ રહેશે અને ક્યારેય વધારાશે નહીં.
– મહત્તમ વેતન અને મહિના મુજબનું ઈન્સેન્ટીવ 15 તારીખે એ જ મહિનામાં આપવું.
– હાજરી 1/4 થી 1/2 થી 3/4ના આગળના જૂના નિયમ પ્રમાણે રાખવામાં આવે.
– કંપની અને કોન્ટ્રાક્ટના તમામ કારીગરોને ફ્રીમાં કંપનીના લોગો વાળી ટી-શર્ટ અને સેફ્ટી શૂઝ આપવા.
– સ્કેલ અને સિનિયોરિટી પ્રમાણે વેતનમાં વધારો કરવો.
– સુપરવાઈઝર કોઈપણ કારીગરને કાઢવાની ધમકી અથવા દબાણ કરી શકશે નહીં.
