એક રુમના ક્વાર્ટરમાં રહીને અભ્યાસ કર્યો સાયન્સમાં ૯૮.૪૨ પર્સેન્ટાઈલ પ્રાપ્ત કર્યા | studied in one room quarter and got success in gujarat board result
વડોદરાઃ નિષ્ઠા, મહેનત, લગન સાથે અભ્યાસ કરવામાં આવે તો ગમે તેવી અડચણો પણ સફળતાની આડે આવતી નથી તેવું ભાર્ગર્વી સોલંકીએ સાબિત કર્યું છે.એક રુમના મકાનમાં રહીને અભ્યાસ કરનાર ભાર્ગવીએ ધો.૧૨ સાયન્સના આજે જાહેર થયેલા પરિણામમાં ૯૮.૪૨ પર્સેન્ટાઈલ પ્રાપ્ત કર્યા છે.
ડભોઈ રોડ પર આવેલી કંપનીમાં સામાન્ય કામ કરતા ભાર્ગવીના પિતા અનિલભાઈ સોલંકીએ દીકરીને ટયુશન કરાવવા માટે લોન લીધી હતી.આજે પરિણામ જાહેર થયા બાદ તેમની આંખમાં આંસુ આવી ગયા હતા.તેમણે કહ્યું હતું કે, સ્કોલરશિપ મેળવવા માટે અમે પ્રયાસો કર્યા હતા પણ તેમાં સફળતા મળી નહોતી.મારો પગાર ૧૫૦૦૦ રુપિયા છે.જેમાંથી લોનના હપ્તા પણ ભરું છું અને ઘર પણ ચલાવું છું.અમે જ્યાં રહીએ છે તે પણ કંપનીનું ક્વાર્ટર છે.
ભાર્ગવીએ કહ્યું હતું કે, એક જ રુમ હોવાથી હું રાત્રે પરિવારના બીજા સભ્યો ઉંઘી જાય તે પછી વાંચવાનું પસંદ કરતી હતી.જેથી એકાગ્રતા જળવાઈ રહે.રોજ હું સાત થી આઠ કલાકનું વાંચન કરતી હતી.હવે હું કોમ્પ્યુટર એન્જિનિયરિંગ કે આર્ટિફિશિયલ ઈન્ટેલિજન્સનો અભ્યાસ કરવા માગુ છું.જેથી ભવિષ્યમાં હું સારી નોકરી કરીને મારા માતા પિતાની અને પરિવારની આર્થિક સ્થિતિ સુધારી શકું.
