ધો.12 પરિણામ: નાપાસ કે અસંતુષ્ટ વિદ્યાર્થીઓ માટે જૂન મહિનામાં પૂરક પરીક્ષા, ‘બેસ્ટ ઓફ ટુ’ મુજબ ગણાશે રિઝલ્ટ | Gujarat Class 12 Supplementary Exam 2026 in June Best of Two Rule for Students
Class 12 Supplementary Exam 2026: ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા ધોરણ-12 વિજ્ઞાન પ્રવાહ અને સામાન્ય પ્રવાહનું પરિણામ જાહેર કરી દેવામાં આવ્યું છે. આ વર્ષે વિજ્ઞાન પ્રવાહનું 84.33% અને સામાન્ય પ્રવાહનું 92.71% પરિણામ નોંધાયું છે. જે વિદ્યાર્થીઓ આ પરીક્ષામાં ઉત્તીર્ણ નથી થઈ શક્યા અથવા જેઓ પોતાના ગુણથી સંતુષ્ટ નથી, તેમના માટે બોર્ડે ‘બેસ્ટ ઓફ ટુ’ હેઠળ પૂરક પરીક્ષાની જાહેરાત કરી છે.
વર્ષ ન બગડે તે હેતુથી પૂરક પરીક્ષાનું આયોજન
શિક્ષણ બોર્ડના જણાવ્યાનુસાર, નાપાસ થયેલા વિદ્યાર્થીઓનું શૈક્ષણિક વર્ષ ન બગડે તે હેતુથી આગામી જૂન મહિનામાં પૂરક પરીક્ષાનું આયોજન કરવામાં આવશે. આ પરીક્ષામાં વિદ્યાર્થીઓ બે વાર પરીક્ષા આપી શકશે અને જે પરીક્ષાનું પરિણામ સારું હશે તેને માન્ય રાખવામાં આવશે. બોર્ડ દ્વારા આજથી જ આ કામગીરી માટેની તૈયારીઓ શરૂ કરી દેવામાં આવી છે.
ટૂંક સમયમાં જાહેર થશે ટાઈમ ટેબલ
સૂત્રો પાસેથી મળતી વિગત મુજબ, શિક્ષણ બોર્ડ આગામી દિવસોમાં પૂરક પરીક્ષાનો સંપૂર્ણ કાર્યક્રમ જાહેર કરશે. પૂરક પરીક્ષાનું વિગતવાર ટાઈમ ટેબલ આવતા અઠવાડિયે સત્તાવાર રીતે પ્રસિદ્ધ કરવામાં આવશે. વિદ્યાર્થીઓએ પૂરક પરીક્ષાના ફોર્મ ભરવા માટે બોર્ડની સત્તાવાર વેબસાઈટ અથવા પોતાની શાળાનો સંપર્ક કરવાનો રહેશે. આ નિર્ણયથી હજારો વિદ્યાર્થીઓને પોતાનું પરિણામ સુધારીને આગળના અભ્યાસ માટેની તક મળશે.
