અમદાવાદ: નિકોલની હોસ્પિટલમાં નોકરીના પહેલા જ દિવસે સ્વીપરે હાથફેરો કર્યો, રૂ. 90 હજારની ચોરી કરી ફરાર | Sweeper Steals ₹90 000 from Ahmedabad Hospital on First Day of Work
Ahmedabad Hospital Theft: અમદાવાદના નિકોલ વિસ્તારમાં આવેલી એક હોસ્પિટલમાં ચોરીની અજીબ ઘટના સામે આવી છે. હોસ્પિટલના મેડિકલ સ્ટોરમાં સફાઈ કામદાર (સ્વીપર) તરીકે નોકરીએ લાગેલા શખસે પ્રથમ દિવસે જ તકનો લાભ ઉઠાવી ડ્રોવરમાં રાખેલા 90,000 રૂપિયાની રોકડ રકમની ચોરી કરી છે. સમગ્ર મામલે પોલીસે ગુનો નોંધી વધુ તપાસ હાથ ધરી છે.
ઓળખના પુરાવા આપ્યા પહેલા જ ચોરીને અંજામ આપ્યો
પોલીસ ફરિયાદ અનુસાર, 17મી એપ્રિલ 2026ના રોજ હોસ્પિટલના એચ.આર. વિભાગ દ્વારા એક વ્યક્તિને સ્વીપર તરીકે કામ પર રાખવામાં આવ્યો હતો. આ શખસે વિશ્વાસ અપાવ્યો હતો કે તે બીજા દિવસે સવારે પોતાના ઓળખના પુરાવા જમા કરાવશે. આ વાયદા સાથે તેણે તે જ દિવસે નાઈટ શિફ્ટમાં કામ શરૂ કર્યું હતું.
18મી એપ્રિલના રોજ સવારે જ્યારે ફાર્મસીનો સ્ટાફ ફરજ પર હાજર થયો, ત્યારે ટેબલના ડ્રોવરનું લોક તૂટેલું અને સામાન વેરવિખેર હાલતમાં જોવા મળ્યો હતો. હોસ્પિટલના સીસીટીવી ફૂટેજ તપાસતા ચોંકાવનારી હકીકત સામે આવી હતી. જેમાં વહેલી સવારે સવા પાંચ વાગ્યે નવો સ્વીપર પોતાના મોબાઈલની ફ્લેશ લાઈટનો ઉપયોગ કરીને મેડિકલ સ્ટોરમાં પ્રવેશતો જણાયો હતો. તે શખસ ડ્રોવરનું લોક તોડીને તેમાંથી રોકડ રકમ કાઢતો સ્પષ્ટ દેખાયો હતો. મેડિકલ સ્ટોરના રજિસ્ટરની તપાસ કરતા કુલ 90,000 રૂપિયાની રોકડ ગાયબ હોવાનું માલુમ પડ્યું હતું.
આ પણ વાંચો: ધોરણ 12નું પરિણામ જાહેર, સાયન્સનું 84.33% તો સા.પ્રવાહનું 92.71% રિઝલ્ટ, આ રીતે કરો ચેક
પોલીસ કાર્યવાહી
સીસીટીવી ફૂટેજ અને હિસાબના પુરાવાઓના આધારે હોસ્પિટલના ડોક્ટરે પોલીસ મથકે ફરિયાદ નોંધાવી છે. પોલીસે આરોપીની શોધખોળ શરૂ કરી છે, જોકે આરોપીએ હજુ સુધી ઓળખના પુરાવા જમા ન કરાવ્યા હોવાથી તેને શોધવો પોલીસ માટે એક પડકાર બન્યો છે.
