વલસાડના ગ્રાહકમાં બેંક ખાતામાં વડોદરામાં 500ની 20 ડુપ્લીકેટ નોટો જમા કરાવી અજાણ્યો શખ્સ ફરાર | person depositing 20 duplicate 500 notes in bank account of customer from Valsad in Vadodara
Vadodara Fake Indian Currency : વડોદરાના બજારોમાં છેલ્લા કેટલાક સમયથી ડુપ્લીકેટ નોટો ઘુસાડવાનું વ્યવસ્થિત રીતે ષડયંત્ર ચાલી રહ્યું હોય તે રીતે કિસ્સા બની રહ્યા છે. તેના ભાગરૂપે બેંકોમાંથી પણ ડુપ્લીકેટ નોટો મળી રહી છે.
વડોદરાના વાઘોડિયા રોડ વિસ્તારમાં આવેલી એચડીએફસી બેન્કમાં ગઈકાલે તા.29મીએ આવા જ એક કેસમાં રૂ.500ના દરની 20 ડુપ્લીકેટ નોટો મળી આવી છે. બેંકના સુપરવાઇઝરે સવારે કેશ લોડીંગની કાર્યવાહી દરમિયાન તપાસ કરતા કેશ બોક્સમાંથી અલગથી તારવેલી ડુપ્લીકેટ નોટો મળી આવી હતી.
ત્યારબાદ બેંક દ્વારા વધુ તપાસ કરાવતા જે એકાઉન્ટ નંબરમાં નોટો જમા કરાવવામાં આવી હતી તેનો સમય સવારે 3.48 કલાક જણાયો હતો. જે ખાતાધારકનું નામ મારું સાગર રમેશભાઈ (ડુંગરી ગામ, વલસાડ) હોવાનું ખુલ્યું હતું. મોબાઈલ નંબર પણ લખેલો હોવાથી તેનો સંપર્ક કરાતા ગ્રાહકે આ રકમ તેણે નહીં ભરી હોવાનું અને કોઈ બીજી વ્યક્તિ તેના એકાઉન્ટમાં રૂપિયા ભરી ગઈ હોવાનું જણાવ્યું હતું.
આમ ડુપ્લીકેટ નોટો જમા કરાવવાનો કારસો રચાયો હોવાની શંકા જતા બેંક દ્વારા ક્રાઈમ બ્રાન્ચમાં પોલીસ ફરિયાદ નોંધાવવામાં આવી હતી. પોલીસે સીસીટીવી ફૂટેજ તેમજ અન્ય સોર્સ મારફતે તપાસ શરૂ કરી છે.
