અમદાવાદ: વેપારીનો અશ્લીલ વીડિયો ઉતારી 8 લાખ પડાવ્યા, નકલી પોલીસે કેસ રફેદફે કરવા 15 લાખ માગ્યા | Ahmedabad Man Duped in Honeytrap Extortion of Rs 8 88 Lakh Reported
Ahmedabad Honeytrap Case: અમદાવાદના જશોદાનગર વિસ્તારમાં રહેતા અને કેટરિંગનો વ્યવસાય કરતા 54 વર્ષીય વેપારી હનીટ્રેપ અને બ્લેકમેલિંગનો શિકાર બન્યા છે. વર્ષ 2023માં ટ્રેનની મુસાફરી દરમિયાન પંજાબના ફિરોજપુરના એક યુવક સાથે થયેલી સામાન્ય મિત્રતા આ વેપારી માટે મોટી મુસીબત બની ગઈ. ઠગે આધેડને વિશ્વાસમાં લઈ, તેમની પાસેથી શરૂઆતમાં સહાનુભૂતિના નામે પૈસા પડાવ્યા અને ત્યારબાદ અશ્લીલ વીડિયો બનાવીને લાખો રૂપિયાની ખંડણી વસૂલ કરી હોવાની ખોખરા પોલીસ સ્ટેશને ફરિયાદ નોંધાઈ છે.
જાણો શું છે મામલો
આ ઘટનાની શરૂઆત વર્ષ 2023માં થઈ હતી જ્યારે વેપારી પંજાબ જઈ રહ્યા હતા, ત્યારે નિખિલ ખુરાના નામના શખસ સાથે તેમની ઓળખાણ થઈ હતી. બે મહિના પછી નિખિલે માતાની બીમારી અને પરીક્ષાની ફીનું બહાનું કાઢીને વેપારી પાસેથી ગુગલ પે મારફતે 17000 રૂપિયા લીધા હતા. ત્યારબાદ સપ્ટેમ્બર 2025માં નિખિલે વેપારીને વીડિયો કોલ કરી બિભત્સ વાતો કરી તેમને ઉશ્કેર્યા હતા અને છૂપી રીતે અશ્લીલ વીડિયો રેકોર્ડ કરી લીધો હતો. આ વીડિયોના આધારે નિખિલ અને તેના ભાઈ સાહિલ ખુરાનાએ વેપારીને બદનામ કરવાની ધમકી આપીને ટુકડે ટુકડે 8.88 લાખ રૂપિયા પડાવી લીધા હતા.
આ પણ વાંચો: અમદાવાદ: સાબરમતી નદીમાંથી મળેલી લાશનો ભેદ ઉકેલાયો, અકસ્માત નહીં પણ હત્યા હતી
આટલા લાખો રૂપિયા પડાવી લીધા પછી પણ ઠગને સંતોષ થયો ન હતો. આ ટોળકીના ત્રીજા સાગરીત રાહુલે પોતે ક્રાઈમ બ્રાન્ચનો PI હોવાની ઓળખ આપીને આધેડ વેપારીને ડરાવ્યા હતા અને કેસ રફેદફે કરવા માટે 15 લાખ રૂપિયાની મોટી રકમ માગી હતી. આ સતત ધમકીઓ અને માનસિક ત્રાસથી કંટાળીને આખરે વેપારીએ હિંમત દાખવીને સાયબર ક્રાઈમનો સંપર્ક કર્યો હતો. આ ફરિયાદના આધારે ખોખરા પોલીસે ત્રણેય આરોપીઓ નિખિલ, સાહિલ અને રાહુલ વિરુદ્ધ ગુનો નોંધીને તપાસ હાથ ધરી છે.
