ગુજરાતમાં બેવડી ઋતુ: પાટણમાં ભરઉનાળે વરસાદી ઝાપટું, રાજકોટમાં ગરમીનો પારો 43ને પાર | Gujarat Weather Update: Unseasonal Rain in Patan Rajkot Hottest City
Gujarat Weather Update: ગુજરાતભરમાં કાળઝાળ ગરમીનો પ્રકોપ વર્તાઈ રહ્યો છે. આ દરમિયાન બુધવારે(29 એપ્રિલ, 2026) બપોર બાદ વાતાવરણમાં અચાનક પલટો આવતા પાટણ સહિતના કેટલાક વિસ્તારોમાં કમોસમી વરસાદ થયો હતો. તો બીજી તરફ, રાજ્યમાં સૌથી વધુ રાજકોટમાં 43.6 ડિગ્રી મહત્તમ તાપમાન નોંધાયું છે. હવામાન વિભાગ મુજબ, ગુરુવાર(30 એપ્રિલ)થી તાપમાનમાં ઘટાડો નોંધાતા ગરમીથી આંશિક રાહત મળી શકશે.
ભરઉનાળે પાટણમાં કમોસમી વરસાદ
વાતાવરણમાં પલટો આવતા ભરઉનાળે પાટણમાં ચોમાસા જેવી સ્થિતિ સર્જાઈ હતી. જેમાં કાળઝાળ ગરમીના માહોલ વચ્ચે પાટણ સહિતના વિસ્તારોમાં કમોસમી વરસાદ વરસ્યો હતો. એકાએક જોરદાર ઝાપટું પડતાં રસ્તા પર પાણી ફરી વળ્યા હતા.
આવતીકાલથી ગરમીમાં આંશિક રાહત
હવામાન વિભાગ અનુસાર, રાજ્યમાં ભેજવાળા પવન ફૂંકાતા આવતીકાલ(30 એપ્રિલ)થી ગરમીથી આંશિક રાહત મળી શકે છે. જેમાં મહત્તમ તાપમાન 43 ડિગ્રી સુધી રહેવાની શક્યતા છે. જ્યારે સામાન્ય તાપમાન કરતાં 1-2 ડિગ્રીનો ઘટાડો નોંધાશે. આમ, આગામી ત્રણ દિવસ 40થી 43 ડિગ્રી તાપમાન રહેવાની સંભાવના છે.
આ પણ વાંચો: VIDEO: વાપીમાં અકસ્માત બાદ ભીષણ આગ, સળગતું કન્ટેઇનર બ્રિજ પર લટકી ગયું
રાજ્યનું મહત્તમ તાપમાન
રાજ્યભરમાં ગરમીનો પારો હાઈ જોવા મળી રહ્યો છે. કચ્છ-સૌરાષ્ટ્ર સહિતના જિલ્લાઓમાં સામાન્ય તાપમાન કરતાં 2-3 ડિગ્રીનો વધારો જોવા મળ્યો હતો. જેમાં છેલ્લા 24 કલાકમાં રાજ્યમાં સૌથી વધુ રાજકોટમાં 43.6 ડિગ્રી મહત્તમ તાપમાન નોંધાયું છે. જ્યારે અમદાવાદમાં 43 ડિગ્રી, સુરેન્દ્રનગર, અમરેલી અને ગાંધીનગરમાં 42 ડિગ્રીથી વધુ, રાજકોટ, વીવી નગર, ડીસા સહિતના જિલ્લામાં 41 ડિગ્રીથી વધુ તાપમાન નોંધાયું છે.
