વડોદરા: વોર્ડ-16ના 78 વર્ષીય વરિષ્ઠ મતદારે મતદાન કરીને ચૂંટણી તંત્રની વ્યવસ્થાને બિરદાવી | Vadodara: 78 Year Old Senior Citizen Casts Her Vote Praises Election Arrangements
લોકશાહીના મહાપર્વ સમાન સ્થાનિક સ્વરાજ્યની ચૂંટણી અંતર્ગત વડોદરા શહેર અને જિલ્લામાં શાંતિપૂર્ણ માહોલમાં મતદાન પ્રક્રિયા હાથ ધરવામાં આવી રહી છે. આ લોકશાહીના ઉત્સવમાં વરિષ્ઠ નાગરિકો પણ પૂરા ઉત્સાહ સાથે જોડાઈ રહ્યા છે. વડોદરા મહાનગરપાલિકાના વોર્ડ નંબર-16ના 78 વર્ષીય વરિષ્ઠ મતદાર શ્રીમતી હંસાબેન જાનીએ આજે પોતાના નિયત મતદાન કેન્દ્ર ખાતે જઈને પોતાના મતાધિકારનો ઉપયોગ કર્યો હતો. ઉંમરના આ પડાવે પણ લોકશાહી પ્રત્યેની પોતાની પવિત્ર ફરજ અદા કરીને તેમણે અન્ય મતદારો અને ખાસ કરીને યુવાનો માટે એક ઉત્તમ ઉદાહરણ પૂરું પાડ્યું છે.
મતદાનની પ્રક્રિયા પૂર્ણ કર્યા બાદ વરિષ્ઠ મતદાર હંસાબેન જાનીએ વડોદરા જિલ્લા ચૂંટણી તંત્ર દ્વારા મતદાન મથક ખાતે કરવામાં આવેલી સુચારુ અને અસરકારક વ્યવસ્થાની ભારે સરાહના કરી હતી. તેમણે જણાવ્યું હતું કે, ચૂંટણી પંચ અને સ્થાનિક વહીવટી તંત્ર દ્વારા વરિષ્ઠ નાગરિકો તેમજ અન્ય મતદારોને કોઈપણ પ્રકારની અગવડતા ન પડે તે માટે માળખાગત સુવિધાઓ સહિતની સુંદર વ્યવસ્થા ગોઠવવામાં આવી છે, જેના કારણે મતદાન પ્રક્રિયા અત્યંત સરળ અને ઝડપી બની છે.
