ભાજપના પ્રમુખ કમળનો સિમ્બોલ ઝભ્ભા પર લગાવી મતદાન કરતા કોંગ્રેસ પ્રમુખનો વિરોધ | Gujarat Election Congress Chief Protests After BJP President Votes Wearing Party Symbol on Kurta
વડોદરા ભાજપના પ્રમુખ જયપ્રકાશ સોનીએ કમળ સિમ્બોલ ઝભ્ભા પર લગાવી મતદાન મથકમાં મતદાન કરતા કોંગ્રેસના પ્રમુખ ઋત્વિજ જોષીએ વિરોધ નોંધાવ્યો છે.
તેમણે જણાવ્યું છે કે, વડોદરા શહેરમાં સ્થાનિક સ્વરાજ્યની ચૂંટણી દરમિયાન જ્યાં ચૂંટણી આચારસંહિતાનું કડક પાલન થવું જોઈએ, ત્યાં જ ભાજપના શહેર અધ્યક્ષ ડૉ. જયપ્રકાશ સોની દ્વારા નિયમોનું ખુલ્લેઆમ ઉલ્લંઘન થયાનું દ્રશ્ય સામે આવ્યું છે. માંજલપુર વિસ્તારમાં મતદાન માટે પહોંચેલા અધ્યક્ષ પોતાનાં ઝભ્ભા પર ભાજપનું સિમ્બોલ લગાવીને મતદાન મથકની અંદર પ્રવેશતા જોવા મળ્યા.
ચૂંટણી નિયમો મુજબ મતદાન મથકની અંદર કોઈપણ પ્રકારની રાજકીય ઓળખ અથવા પ્રચાર પર પ્રતિબંધ હોય છે, ત્યારે આ ઘટના અનેક સવાલો ઉભા કરે છે. શું ભાજપના અધ્યક્ષ હોવાના કારણે તેમને છૂટછાટ આપવામાં આવી? શું મતદાન મથકના અધિકારીઓએ આ દ્રશ્ય જોયું નહીં કે પછી આંખ આડા કાન કર્યા?
આ ઘટના એ પણ દર્શાવે છે કે શું નિયમો ફક્ત વિરોધ પક્ષ માટે જ લાગુ પડે છે અને સત્તાધારી પક્ષ માટે માત્ર કાગળ પર જ રહે છે? લોકશાહીમાં સમાનતા અને પારદર્શકતા જરૂરી છે, પરંતુ આવી ઘટનાઓ લોકવિશ્વાસને ઝંઝોળે છે.
