મહાયુદ્ધની આશંકા? 3 યુદ્ધજહાજ દ્વારા અમેરિકાએ કરી ઘેરાબંધી, તેહરાનમાં ધડાકા વચ્ચે ઈઝરાયલ એક્ટિવ | US Deploys 3rd Aircraft Carrier to Gulf Amid Tehran Blasts Israel Ready for War
US Deploys 3rd Aircraft Carrier to Gulf : મધ્ય-પૂર્વ (મિડલ ઈસ્ટ) માં સ્થિતિ વધુ સ્ફોટક બની રહી છે. અમેરિકાએ ઈરાન સામે તેની સૈન્ય તાકાત વધારતા ખાડી વિસ્તારમાં પોતાનું ત્રીજું વિશાળ યુદ્ધપોત તૈનાત કર્યું છે. બીજી તરફ, ઈરાનની રાજધાની તેહરાનમાં મોડી રાત્રે થયેલા ધડાકાઓએ સમગ્ર વિશ્વમાં ચિંતા વધારી દીધી છે.
અમેરિકાની ‘ત્રિશક્તિ’ તૈનાત
અમેરિકન સેન્ટ્રલ કમાન્ડે પુષ્ટિ કરી છે કે ‘USS જ્યોર્જ એચડબલ્યુ બુશ’ હિંદ મહાસાગર પાર કરીને ખાડી તરફ આગળ વધી રહ્યું છે. આ યુદ્ધપોતે હુતી વિદ્રોહીઓના ખતરાને કારણે લાંબો રૂટ (કેપ ઓફ ગુડ હોપ) પસંદ કર્યો છે. આ સાથે જ હવે આ વિસ્તારમાં અમેરિકાના ત્રણ શક્તિશાળી બેડા હાજર છે:
USS અબ્રાહમ લિંકન (અરબ સાગરમાં)
USS જેરાલ્ડ આર. ફોર્ડ (રેડ સી વિસ્તારમાં)
USS જ્યોર્જ એચ.ડબલ્યુ. બુશ (નવી તૈનાતી)
ત્રણ વિમાન વાહક જહાજોની એકસાથે હાજરી અમેરિકા તરફથી ઈરાનને કડક સંદેશ માનવામાં આવે છે, જે કોઈપણ સમયે મોટા હવાઈ હુમલા કે દરિયાઈ નાકાબંધી કરવાની ક્ષમતા ધરાવે છે.
તેહરાનમાં ધડાકા અને ઈઝરાયલની ચેતવણી
ઈરાનની રાજધાની તેહરાનમાં ગુરુવારે રાત્રે હવાઈ સુરક્ષા પ્રણાલી સક્રિય થવાના અવાજો સંભળાયા હતા. ઈરાની એજન્સીઓ મુજબ, શંકાસ્પદ લક્ષ્યોને તોડી પાડવા એર ડિફેન્સ બેટરીઓનો ઉપયોગ કરવામાં આવ્યો હતો. આ હલચલ બાદ ઈઝરાયલના સંરક્ષણ મંત્રીએ મોટું નિવેદન આપતા કહ્યું કે તેમની સેના ઈરાન સામે ઓપરેશન શરૂ કરવા માટે સંપૂર્ણ રીતે સજ્જ છે.
ઈરાનનું વલણ
ધડાકાઓ અને યુદ્ધની આશંકાઓ વચ્ચે ઈરાન સરકારે નિવેદન બહાર પાડ્યું છે કે તેમના તમામ સરકારી સંસ્થાન શિસ્તબદ્ધ રીતે કામ કરી રહ્યા છે. ઈરાને દાવો કર્યો છે કે ઈઝરાયેલની હત્યાની સાજીશો નિષ્ફળ રહી છે અને તેઓ યુદ્ધના મેદાન અને કૂટનીતિ એમ બંને મોરચે લડવા માટે એકજૂથ છે.
