હીટવેવના કારણે સ્કૂલો સવારની પાળીમાં ચલાવવા માટે આદેશ | schools in vadodara should be run in morning due to heatwave
વડોદરાઃ રાજ્યના અન્ય શહેરોની જેમ વડોદરામાં પણ હીટવેવ ચાલી રહ્યો છે અને તેના કારણે સ્કૂલોમાં અને ખાસ કરીને સીબીએસઈ સ્કૂલોમાં અત્યારે શિક્ષણ ચાલી રહ્યું છે ત્યારે ડીઈઓ કચેરી દ્વારા તમામ સ્કૂલોને સવારની પાળીમાં ચલાવવાનો આદેશ આપ્યો છે.
સ્કૂલોને પરિપત્ર પાઠવીને ડીઈઓ કચેરીએ કહ્યું છે કે, સ્કૂલોના સમય એ પ્રકારે રાખવાનો રહેશે કે જેથી વિદ્યાર્થીઓ બપોર પહેલા ઘરે સુરક્ષિત પહોંચી જાય છે.સાથે સાથે શાળામાં પીવાના ઠંડા અને શુધ્ધ પાણીની પૂરતી વ્યવસ્થા કરવી, વર્ગખંડોમાં પંખા ચાલુ સ્થિતિમાં હોય તેની ખાતરી કરી લેવી તેમજ વિદ્યાર્થીઓને રિસેસ દરમિયાન કે સ્કૂલ છૂટે તે પછી તડકામાં નહીં ઉભા રાખવા.ગરમીના કારણે કોઈ વિદ્યાર્થીની તબિયત લથડે તો સ્કૂલોએ તેને પ્રાથમિક સારવાર મળે તેવી વ્યવસ્થા કરવાની રહેશે.
ડીઈઓ કચેરીએ ગાઈડ લાઈનમાં કહ્યું છે કે, ખુલ્લા મેદાનમાં પ્રાર્થના સભા કે રમત ગમતની પ્રવૃત્તિઓ પણ હાલ પૂરતી મોકૂફ રાખવી અથવા તો છાંયડો હોય ત્યાં જ આ પ્રાકની પ્રવૃત્તિ કરવી.ગાઈડ લાઈનનું પાલન નહીં કરનાર શાળાઓ સામે આકરા પગલા લેવામાં આવશે.
