કોંગ્રેસના ઉમેદવારો પર ફોર્મ પરત ખેંચવા દબાણનો આરોપ | Congress candidates accused of being pressured to withdraw their forms
ગુજરાત પ્રદેશ કોંગ્રેસના ઉપપ્રમુખ અને વડોદરા પ્રભારીએ ભાજપ પર પ્રહારો કરી જણાવ્યું કે, આ ચૂંટણીમાં વીએમસી ગુમાવી રહેલ ભાજપ કોંગ્રેસ ઉમેદવારોને ફોર્મ પરત ખેંચવા મજબૂર કરી રહી છે.
વોર્ડ નંબર ૨નાં કોંગ્રેસના ઉમેદવાર ભૂમિ પ્રજાપતિ ભાજપના આગેવાનો સમક્ષ રડતાં રડતાં ઉમેદવારી પરત ખેંચવાની સહી કરવા મજબૂર થઈ છે. આ અંગે કોંગ્રેસે ચૂંટણી કમિશ્નર તેમજ જિલ્લા કલેક્ટર સમક્ષ ફરિયાદ કરી છે.
કનુ પ્રજાપતિએ ગુરુજીની આજ્ઞા અને સમાજના આગેવાનો સાથે સલાહ લઈ ટિકિટ મેળવી હતી, પરંતુ ભાજપ અને દલસુખ પ્રજાપતિ તરફથી થયેલા દબાણ બાદ ઉમેદવારી પાછી ખેંચવી પડી છે.
વધુમાં જણાવ્યું કે, વડોદરામાં કુલ ૧૫ કોંગ્રેસ ઉમેદવારોને ફોર્મ પરત ખેંચવા ભાજપ દ્વારા દબાણ કરાયું છે. આજે અલગ અલગ ઘટના દરમ્યાન ઝપાઝપી થતાં પોલીસે ૩૦ કોંગ્રેસ કાર્યકરોની અટકાયત કરી છે. વડોદરા જિલ્લામાં પણ આ પ્રકારની ઘટનાઓ નોંધાઈ છે.
ભૂમિ પ્રજાપતિ, કનુ પ્રજાપતિ તેમજ અપક્ષ ઉમેદવાર હરીશ પટેલ સામે પક્ષ અનુશાસન ભંગ બદલ છ વર્ષ માટે સસ્પેન્ડ કરવાની કાર્યવાહી કરાશે.
તો બીજીતરફ, કોંગ્રેસ વર્તુળોમાં એ વાતનો ગણગણાટ છે કે, પાયાના કાર્યકરોની અવગણના કરી વ્હાલા-દવલાની નીતિ અપનાવી રાતોરાત ઉભા કરાયેલા ઉમેદવારોના કારણે જ આ પરિસ્થિતી સર્જાઈ છે.
ફોર્મ પરત નહીં ખેંચું, હું વેચાવાનો નથી વોર્ડ રના કોંગ્રેસ ઉમેદવારનો મક્કમ મિજાજ
વોર્ડ નંબર રમાં ભમિ પ્રજાપતિ બાદ કોંગ્રેસના બીજા ઉમેદવાર દીપક પટેલ પર પણ ઉમેદવારી પરત ખેંચવા દબાણ કરાયું છે.
દીપક પટેલે સ્પષ્ટ શબ્દોમાં જણાવ્યું કે, છેલ્લા બે દિવસથી તેમના પર સતત દબાણ કરવામાં આવી રહ્યું છે અને જુદી જુદી ઓફરો પણ અપાઈ છે. તેમ છતાં તેઓ ચૂંટણી લડવાના નિર્ણય પર અડગ છે. પરિણામ જે આવે તે, પણ હું ફોર્મ પરત ખેંચવાનો નથી એમ તેમણે દૃઢતાથી કહ્યું છે.
સૌથી ચોંકાવનારી વાત એ છે કે દીપક પટેલ પર અંગત સ્તરે પણ દબાણ ઊભું કરાયું છે. સુરતથી તેમના વેવાઈ પક્ષ તરફથી ફોન કરાવી ઉમેદવારી પાછી નહીં ખેંચો તો સંબંધ રહેશે નહીં એવી ધમકી સુધ્ધા અપાઈ હોવાનું જણાવ્યું છે.
વધુમાં કહ્યું કે, અંગત સંબંધો અને રાજકીય દબાણ છતાં તેઓ ડગવાના નથી. લોકોનો ભરપૂર સાથ અને સ્નેહ મળી રહ્યો છે, જે તેમને લડવાની હિંમત આપે છે. હું વેચાવાનો નથી.
