વડોદરા સેન્ટ્રલ બસ સ્ટેશનની દુર્ઘટના: શેડ ધરાશાયી થવાની ઘટનાના ચોંકાવનારા CCTV ફૂટેજ સામે આવ્યા | Vadodara Central Bus Station Structure Collapsed Shocking CCTV Footage
Vadodara News: વડોદરાના આંતરરાષ્ટ્રીય સ્તરના સેન્ટ્રલ બસ ટર્મિનલમાં ગત 10મી એપ્રિલ, 2026ના રોજ બસ સ્ટેશનના ઉપરના ભાગનું સ્ટ્રક્ચર અચાનક તૂટી પડતા મોટી દુર્ઘટના ઘટી હતી. જેમાં ટર્મિનલના એન્ટ્રી-એક્ઝિટ પોઈન્ટ પાસે સ્લેબનો એક ભાગ ધરાશાહી થતાં એક વ્યક્તિનું મોત નિપજ્યું હતું. આ ઘટનાએ કરોડોના ખર્ચે બનેલા આ પ્રોજેક્ટની ગુણવત્તા અને તેની જાળવણી કરી રહેલી એજન્સીની ગંભીર બેદરકારી ખુલ્લી પાડી છે, ત્યારે શેડ ધરાશાયી થવાની ઘટનાના CCTV ફૂટેજ સામે આવ્યા છે.
શું હતી સમગ્ર ઘટના?
મળતી માહિતી અનુસાર, વડોદરા સેન્ટ્રલ બસ સ્ટેશનના ઉપરના ભાગનું સ્ટ્રક્ચર અચાનક તૂટી પડતા અફરાતફરી મચી ગઈ હતી. જેમાં બસ સ્ટેશનના ઉપરના હિસ્સાનું બાંધકામ અચાનક તૂટી પડ્યું હતું. ભારેખમ સ્ટ્રક્ચર નીચે આવતા ત્યાં હાજર મુસાફરોમાં ચીસાચીસ મચી ગઈ હતી. ઘટનાની ગંભીરતા જોતા તાત્કાલિક ફાયર બ્રિગેડની ટીમ અને પોલીસનો મોટો કાફલો ઘટનાસ્થળે દોડી આવ્યો હતો. ફાયર વિભાગ દ્વારા કાટમાળ ખસેડીને બચાવ કામગીરી શરૂ કરવામાં આવી હતી. આ દુર્ઘટનામાં એક વ્યક્તિનું મોત નીપજ્યું હતું.
PPP મોડલ અને કરોડોનો ખર્ચ છતાં સુરક્ષા શૂન્ય
વડોદરાનું આ બસ ટર્મિનલ ગુજરાતના આધુનિક પ્રોજેક્ટ્સમાંનું એક ગણાય છે, અંદાજે 110 કરોડના ખર્ચે 20,300 ચોરસ મીટરમાં ફેલાયેલું આ ટર્મિનલ PPP(Public-Private Partnership) મોડલ હેઠળ બનાવાયું છે. Sphere Cube Infrastructure Pvt. Ltd. નામની કંપનીને આગામી 31 વર્ષ સુધી આ ટર્મિનલના સંચાલન અને જાળવણીની જવાબદારી સોંપવામાં આવી છે. સિંગાપુર, શાંઘાઈ અને હોંગકોંગ જેવા આંતરરાષ્ટ્રીય શહેરોના બસ સ્ટેશનોનો અભ્યાસ કરીને આ ડિઝાઇન તૈયાર કરવામાં આવી હતી.
સિક્યુરિટી અને મેન્ટેનન્સની બેદરકારી
આ ઘટનાએ ટર્મિનલની મેન્ટેનન્સ અને સુરક્ષા વ્યવસ્થાને લઈને ગંભીર પ્રશ્નો ઊભા કર્યા છે. કરોડો રૂપિયાના ખર્ચે બનેલા અને આંતરરાષ્ટ્રીય ધોરણો ધરાવતા ટર્મિનલમાં આવી ઘટના બનતા લોકોમાં રોષ ફાટી નીકળ્યો છે. ઘટનાને લઈને હવે જવાબદારી કોની તે અંગે સવાલો ઊભા થયા છે અને બેદરકારી અંગે તપાસની માગ ઉઠી રહી છે.
